Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 52 Hüküm no: 28 Orijinal metin no: [4b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kendi işlerini görmekten aciz ve hasta olan Terlikçi Ahmed’e eşi Cemile’nin vasi tayin olunması Mübâşir Hasköylü Eyüb Çavuş’a teslîm Ma‘rûz, Havâss-ı refî‘a kazâsına muzâfe kasaba-i Hasköy’de Turşucu mahâllesinde sâkin Terlikçi Ahmed b. Süleyman muhtelü’d-dimâ‘ ve gayr-ı reşîd olup bi-nefsihi emvâlini hıfz ve umûr-ı husûsunu idâre ve rü’yete gayr-ı muktedir olduğundan bahisle gayr-ı reşîd-i mezbûrun emvâlini hıfz ve umûr-ı husûsunu rü’yete kıbel-i şer‘den mu‘temedün-aleyh birinin vasî nasb ü ta‘yîn buyrulmasını gayr-ı reşîd-i merkūmun li-ebeveyn er karındaşı Feyzi Ağa işbu arzuhâliyle lede’l-istid‘â husûs-ı mezkûr bâ-fermân-ı âlî hâlâ Mekteb-i Tıbbiye-i Şâhâne Nâzırı sudûr-ı izâmdan semâhatlü es-Seyyid Mehmed Cemaleddin Efendi hazretlerine havâle olunup gayr-ı reşîd-i mezbûr Ahmed Meclis-i Tıbbiye’de lede’l-mu‘âyene hâl inhâ ve istid‘â olunduğu üzere hâmiş-i arzuhâle i‘lâm olunmuş ve kazıyye vech-i muharrer üzere olup ve gayr-ı reşîd-i merkūmun zevcesi zâtı ta‘rîf-i şer‘î ile mu‘arrefe olan işbu hâzıra bi’l-meclis Cemile Hatun bt. Abdurrahim dahi mu‘temede ve umûr-ı vesâyeti rü’yete kādir ve müstakīme olduğu mahâlle-i merkūme imamı es-Seyyid Hâfız Mehmed Emin Efendi b. Hâfız Mustafa ve Hâfız Mehmed Emin Efendi b. el-Hâc Abdullah ve Derviş Ahmed İzzet Efendi b. Ahmed ve Hasan Ağa b. İbrahim ve Derviş Mustafa Ağa b. Ahmed ve gayr-ı reşîd-i mezbûrun dâmâdı Hâfız Ali Efendi b. Abdülbaki nâm kimesnelerin huzûr-ı şer‘de alâ-tarîkı’ş-şehâde haberleriyle zâhir ve mütehakkık oldukdan sonra gayr-ı reşîd-i mezbûr Ahmed’in emvâlini hıfza ve umûr-ı husûsunu idâre ve rü’yete zevcesi mezbûre Cemile Hatun kıbel-i şer‘den vasî nasb ü ta‘yîn olundukda ol dahi vesâyet-i mezkûreyi kabûl ve hizmet-i lâzımesini kemâ-yenbağī edâya ta‘ahhüd ve iltizâm eylediği mahfil-i şer‘iyyâtdan huzûr-ı [âlîlerine i‘lâm olundu]. Fî 18 B sene [12]73. el-Hâc İbrahim.