Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 53 Hüküm no: 29 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habibe Sabik Hanım’a eşi Ahmed Necib’e itaat etmesi hususunda tenbihte bulunulması Sultânahmedli Ahmed Çavuş kaydıyla Çavuşzâde Mustafa Çavuş’a teslîm, İstanbul’da Davudpaşa mahâllesinde sâkin Mâliye Hazîne-i celîlesi’nden Anadolu Masârıfât Muhâsebesi Kalemi ketebesinden sâhib-i arzuhâl Ahmed Necib Efendi b. Veliyüddin mahfil-i şer‘iyyâtda hâlâ zevcesi derûn-ı arzuhâlde mezkûretü’l-ism mu‘arrefetü’z-zât Habibe Sabik Hanım bt. Mehmed İzzet muvâcehesinde mezbûre Habibe Sabik Hanım dört bin bir guruş mehr-i mu‘accel-i müstevfâ ve üç bin guruş mehr-i müeccel tesmiyeleriyle zevce-i menkûha-i medhûlün-bihâm olup ve mehr-i mu‘accel-i mezkûrunu tamâmen edâ ve îfâ etmiş iken mahâlle-i merkūmede vâki‘ tedârik ve müheyyâ eylediğim mesken-i şer‘î olan menzilime gelip bana itâ‘at ve inkıyâd ve hukūk-ı zevciyete mürâ‘ât etmemekle suâl olunup menzil-i mezkûra gelip bana itâ‘at ve inkıyâd ve hukūk-ı zevciyete mürâ‘ât etmek üzere zevcem mezbûre Habibe Sabik Hanım’a tenbîh olunmak murâdımdır deyü ba‘de’d-da‘vâ ve’l-istintâk, ol dahi cevâbında müdde‘î-i merkūm Ahmed Necib Efendi’nin ol mikdâr guruş mehr-i mu‘accel ve müeccel tesmiyeleriyle zevce-i medhûlün-bihâsı olduğunu ve mehr-i mu‘accel-i mezkûrunu dahi istîfâ eylediğini tâyi‘aten ve kat‘iyyen ikrâr u i‘tirâf etmeğin mûcebince menzil-i mezkûra gidip zevci müdde‘î-i mezbûr Ahmed Necib Efendi’ye itâ‘at ve inkıyât ve hukūk-ı zevciyete murâ‘ât etmek üzere mezbûre Habibe Sabik Hanım’a tenbîh olunduğu tescîl ve huzûr-ı [âlîlerine i‘lâm olundu]. Fî 5 B sene [12]73.