Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 53 Hüküm no: 30 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Ağa’nın oğlu Mehmed Şükrü’den satın almış olduğu ev hissesinin kendisine teslimi Hademe-i hazret-i âsafîden Hacı Mehmed Kavvâs’a teslîm Sâhib-i arzuhâl nakkaş esnâfından İsmail Ağa b. Mehmed Emin nâm kimesne mahfil-i şer‘iyyâtda mezbûrun sulbî kebîr oğlu derûn-ı arzuhâlde mezkûrü’l-ism Mehmed Şükrü Efendi muvâcehesinde İstanbul’da Ebulfeth Gāzî Sultân Mehmed Han -aleyhi’r-rahmetü ve’l-gufrân- hazretleri câmi‘-i şerîfi kurbünde Kumrulu Mescidi nâm-ı diğer Mimarsinan mahâllesinde vâki‘ iki tarafdan Mehmed Efendi b. Ali b. Abdullah menzili ve bir tarafdan Emine Hatun bt. Abdullah b. Abdurrahman menzili ve taraf-ı râbi‘i tarîk-i âm ile mahdûd ve arsası Dilber Hatun Vakfı’na senevî kırk akçe mukāta‘a-i kadîmeli ve üzerinde mevcûde bi’l-cümle ebniyesi mülk ma‘lûmü’l-müştemilât bir bâb menzil oğlum mezbûr Mehmed Şükrü Efendi’nin müstakillen yedinde malı ve mülkü iken oğlum mezbûr Mehmed Şükrü Efendi ber-minvâl-i muharrer mâlik olduğu ebniye-i memlûke-i mezkûrenin nısf hisse-i şâyi‘asını yedinde ibkā ve nısf-ı şâyi‘-i âharını yedimde olup iki yüz elli iki senesi Zilka‘desi’nin on yedinci günü târîhiyle müverraha ol târîhde Yoros? nâhiyesinde nâibü’ş-şer‘ bulunan Numan Efendi’nin imzâ ve hatemini hâviye bir kıt‘a hüccet-i şer‘iyye nâtıka olduğu üzere tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile iki yüz elli guruş semen-i medfû‘ ve makbûza bana bey‘ ve temlîk ve vech-i lâyıkı üzere teslîm eylediğinde, ben dahi ber-vech-i muharrer iştirâ ve temellük ve tesellüm ve kabz ü kabûl etmiş iken oğlum mezbûr Mehmed Şükrü Efendi ebniye-i memlûke-i mezkûrede şirâen mâlik olduğum nısf hisse-i şâyi‘a-i merkūmeyi bu esnâda fuzûlî ve bi-gayrı hakkın zabt ve hâlâ vaz‘-ı yed eder olmağla suâl olunup nısf hisse-i şâyi‘a-i mezkûreden keff-i yed ve mahâllinde bana teslîme oğlum mezbûr Mehmed Şükrü Efendi’ye tenbîh olunmak murâdımdır deyü hüccet-i mezkûreyi ibrâzıyla da‘vâ etdikde, ol dahi cevâbında kazıyye minvâl-i muharrer üzere olduğunu ve mazmûn-ı hüccet-i mezkûreyi bi-tamâmihî tâyi‘an ve kat‘iyyen ikrâr ve tasdîk etmeğin mûcebince ebniye-i memlûke-i mezkûrenin nısf hisse-i şâyi‘asından keff-i yed ve müdde‘î-i mezbûr İsmail Ağa’ya redd ü teslîme mezbûr Mehmed Şükrü Efendi’ye tenbîh olunduğu huzûr-ı [âlîlerine i‘lâm olundu] Fî-gurreti Ş sene [12]73. el-Hâc İbrahim