Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 54 Hüküm no: 31 Orijinal metin no: [5a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un Abacı Osman Ağa’dan muhalaa usulüyle boşanması Nüsha-i sâniye Kâtibine teslîm İstanbul’da Kocamustafapaşa kurbünde Ali Fakih mahâllesinde sâkine mu‘arrefetü’z-zât Şerîfe Hadîce Hatun bt. İbrahim mahfil-i şer‘iyyâtda zevc-i muhâlı‘ı bâ‘isü’l-i‘lâm Abacı el-Hâc Osman Ağa b. el-Hâc Halil muvâcehesinde mezbûr el-Hâc Osman Ağa yüz elli guruş mehr-i müeccel tesmiyesiyle zevc-i dâhilim olup lâkin beynimizde hüsn-i mu‘âşeretimiz olmamağla mezbûrun zimmetinde mütekarrir ve ma‘kūdün-aleyh mehr-i müeccel-i mezkûrum olan yüz elli guruş ile nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr el-Hâc Osman Ağa ile muhâla‘a-i sahîha-i şer‘iyye ile hul‘ olduğumda ol dahi hul‘-ı mezkûru ba‘de’l-kabûl hukūk-ı zevciyete ve ibtidâ-yı zevciyetimizden işbu târîh-i i‘lâma gelince sâir cemî‘ hukūk-ı şer‘iyyeye müte‘allıka âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlümüzü hâvî ibrâ ve iskāt eyledik deyü mukırra-i merkūme Şerîfe Hadîce Hatun’un sâdır [5b] olan bi’l-cümle takrîr-i meşrûhunu mezbûr el-Hâc Osman Ağa tasdîk ve tahkīk eylediği tescîl ve mübâşirleri Bâb-ı zabtiye neferâtından Divriğli Musa Ağa kulları yediyle huzûr-ı [âlîlerine i‘lâm olundu]. Fî 7 Ş sene [1]273. Raşid.