Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 55 Hüküm no: 32 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın sahtiyan bedelinden Numan Ağa’da olan alacağının tahsil olunması Ma‘rûz, İstanbul’da Ebulfeth Gāzî Sultân Mehmed Han -aleyhi’r-rahmetü ve’l-gufrân- hazretlerinin câmi‘-i şerîfi civârında Saraçhâne derûnunda tâcir işbu bâ‘isü’l-i‘lâm Mehmed Ağa b. Yusuf mahfil-i şer‘iyyâtda terlikçi esnâfından Numan Ağa b. Mehmed muvâcehesinde mezbûr Numan Ağa zimmetinde bundan akdem malımdan ve yedimden iştirâ ve kabz eylediği tura ve fiâtı beynimizde ma‘lûm sahtiyan semeninden alacak hakkım olan beş yüz on beş guruşun yirmi bir guruşunu rızâmla hatt ü tenzîl ve mutâlebesine müte‘allıka da‘vâdan mezbûrun zimmetini kabûlünü hâvî ibrâ ve iskāt etmemle bâkīsi olan dört yüz doksan dört guruşu mezbûr Numan Ağa’dan hâlâ taleb ederim deyü ba‘de’d-da‘vâ ve’l-istintâk, ol dahi cevâbında kazıyye minvâl-i muharrer üzere olduğunu bi-tamâmihâ tâyi‘an ve kat‘iyyen ikrâr u i‘tirâf etmeğin mûcebince meblağ-ı bâkī-i mezkûr dört yüz doksan dört guruşu müdde‘î-i merkūm Mehmed Ağa’ya edâ ve teslîmiyle mezbûr Numan Ağa ilzâm olunduğunu mübâşirleri Bâb-ı zabtiye neferâtından Amasyalı İbrahim Ağa kulları yediyle huzûr-ı [âlîlerine i‘lâm olundu]. Fî 13 Ş sene [1]273. İbrahim