Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 56 Hüküm no: 33 Orijinal metin no: [5b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’a vefat eden torunu Mehmed Nuri’nin mirasından isabet eden hissesinin teslim olunması Mübâşiri Arabgirî Abdullah Çavuş’a teslîm Ma‘rûz, İstanbul’da Ayasofya-i sagīr mahâllesinde sâkin iken bundan akdem vefât eden sagīr Mehmed Nuri Bey b. el-müteveffâ Mustafa Bey b. Osman’ın min-kıbeli’l-üm ceddesi olup vilâyet-i Anadolu’da Batum kazâsında sâkine sâhibe-i arzuhâl Âişe Hatun bt. Ömer b. Abdullah’ın sadrî kebîr oğlu ve tarafından ber-vech-i âtî verâset ve vekâlet iddi‘â eden Mahmud Ağa b. Ömer nâm kimesne mahfil-i şer‘iyyâtda sagīr-i müteveffâ-yı mezbûrun li-ebeveyn ammi oğulları ve min-ciheti’l-usûbeti’n-nesebiye vârisleri olduğu mukaddemâ mahzar-ı hasm-ı câhidde şâhideyn-i mu‘addileyn şehâdetleriyle ber-nehc-i şer‘î sâbit ve sübût-ı verâsetlerine hükm-i şer‘î lâhık olan Emlâk-ı hümâyûn Çiftlikâtı Nâzırı Hasan Ağa ve li-ebeveyn er karındaşı Mehmed Şakir Ağa ibneyi’l-müteveffâ Ömer Ağa nâm kimesnelerden derûn-ı arzuhâlde mezkûrü’l-ism mezbûr Hasan Ağa muvâcehesinde sagīr-i müteveffâ-yı mezbûr Mehmed Nuri Bey vâlidem ve müvekkilem mezbûre Âişe Hatun’un dâmâdı müteveffâ-yı mezbûr Mustafa Bey b. Osman’ın hayâtında firâşından hâsıl ve sadriye kebîre kerîmesi müteveffât Hadîce Hatun bt. Ömer’den sâlifü’z-zikr Ayasofya-i sagīr mahâllesinde mütevellid olup ol vechile vâlidem ve müvekkilem mezbûr Âişe Hatun sagīr-i müteveffâ-yı mezbûr Mehmed Nuri Bey’in min-kıbeli’l-üm ceddesi olmağla müteveffâ-yı mezbûr Mehmed Nuri Bey’in verâseti ceddesi vâlidem mezbûre Âişe Hatun ile li-ebeveyn ammi oğulları işbu mezbûr Hasan Ağa ve gāib ani’l-meclis mezbûr Mehmed Şakir Ağa’ya münhasıra olmuş iken mezbûr Hasan Ağa nefsinden bi’l-asâle ve karındaşı gāib-i mezbûr Mehmed Şakir Ağa tarafından bi’l-vekâle yedlerinde olup sene-i sâbıkā Zilka‘detü’ş-şerîfesi’nin on üçüncü günü târîhiyle müverrah mahfil-i şer‘iyyâtdan verilen işbu bir kıt‘a i‘lâm-ı şer‘î nâtık olduğu üzere biz sagīr-i müteveffâ-yı mezbûr Mehmed Nuri Bey’in vech-i muharrer üzere hasran vârisleriyiz diyerek sagīr-i müteveffâ-yı mezbûrun cihet-i karzdan bâ-hüccet-i şer‘iyye on yedi bin iki yüz doksan beş buçuk guruş on iki akçe medyûnu olan gāibetü ani’l-meclis Âişe Hanım bt. Abdullah b. Abdurrahman tarafından vekîl-i müsbet-i şer‘îsi kezâlik gāib ani’l-meclis el-Hâc Mahmud Ağa b. Mustafa nâm kimesne muvâcehesinde inkârına mukārin iddi‘â-yı verâset edip ve müdde‘âsını şuhûd-ı udûlle vech-i vecîh-i şer‘î üzere ba‘de’l-isbât ve’l-hükm meblağ-ı mahkûmün-bih-i mezbûr on yedi bin iki yüz doksan beş buçuk guruş on iki akçenin ancak on bir bin dokuz yüz yirmi sekiz guruşunu gāibe-i merkūme Âişe Hanım tarafından bi’l-asâle ve bi’l-vekâle ahz ü kabz ve karındaşı ve müvekkili mezbûr Mehmed Şakir Ağa ile ma‘an beynlerinde ber-vech-i münâsafe tevzî‘ ve taksîm edip mâ‘adâsı olan beş bin üç yüz altmış yedi buçuk guruş on iki akçe el-yevm gāibe-i merkūme Âişe Hanım zimmetinde kalmış ise de meblağ-ı mahkûmün-bih-i mezkûr on yedi bin iki yüz doksan beş buçuk guruş on iki akçenin südüsü olan iki bin sekiz yüz seksen iki buçuk guruş vâlidem müvekkilem mezbûre Âişe Hatun’a ve mâ‘adâsı olan on dört bin dört yüz on üç buçuk guruş mezbûr Hasan Ağa ile karındaşı gāib-i mezbûr Mehmed Şakir Ağa’ya mevrûs olduğuna binâen vâlidem ve müvekkilem mezbûre Âişe Hatun meblağ-ı mezkûr iki bin sekiz yüz seksen iki buçuk guruşu vâzı‘u’l-yed olanlardan taleb ve da‘vâ ve ahz ü kabza ve lede’l-iktizâ sulh ve ibrâya ve husûs-ı mezkûr mütevakkıf olduğu umûrun küllîsine yedimde olup mârrü’z-zikr Batum kazâsı nâibi es-Seyyid Süleyman Sıdkı Efendi’nin imzâ ve hatemini hâviye mührü mutâbık ve meâli usûlüne muvâfık olan işbu bir kıt‘a hüccet-i şer‘iyye mantûkunca beni tarafından vekâlet-i âmme-i mutlakā-i sahîha-i şer‘iyye ile mahzar-ı şuhûdda vekîl ve nâib-i menâb nasb ü ta‘yîn eylediğinde ben dahi vekâlet-i mezkûreyi ba‘de’l-kabûl mezbûr Hasan Ağa’nın kabzını mücîz olduğum meblağ-ı mezkûr on bir bin dokuz yüz yirmi sekiz guruşdan kendi hissesi olan beş bin dokuz yüz altmış dört guruşun südüsü olan dokuz yüz doksan dört guruşu vâlidem ve müvekkilem mezbûre Âişe Hatun için mezbûr Hasan Ağa’dan bi’l-vekâle hâlâ taleb ederim deyü da‘vâ etdikde mezbûr Hasan Ağa dahi cevâbında ben nefsimden bi’l-asâle ve karındaşım gāib-i mezbûr Mehmed Şakir Ağa tarafından bi’l-vekâle medyûne-i gāibe-i mezbûre Âişe Hanım’ın vekîli [6a] gāib-i mezbûr el-Hâc Mahmud Ağa muvâcehesinde sagīr-i müteveffâ-yı mezbûrun li-ebeveyn ammi oğulları ve hasran vârisleri olduğumuzu inkârına mukārin da‘vâ ve ba‘de’l-isbât ve’l-hükm meblağ-ı mahkûmün-bih-i mezkûr on yedi bin iki yüz doksan beş buçuk guruş on iki akçenin ancak bâlâda muharrer meblağ-ı merkūm on bir bin dokuz yüz yirmi sekiz guruşunu gāibe-i mezbûre tarafından bi’l-asâle ve bi’l-vekâle ahz ü kabz ve karındaşım ve müvekkilim mezbûr Mehmed Şakir Ağa ile ma‘an ber-vech-i münâsafe lede’l-iktisâm nısf hissem olan beşbin dokuz yüz altmış dört guruşu ben bi-hakkın istîfâ etmemle mâ‘adâsı olan meblağ-ı merkūm beş bin üç yüz altmış yedi buçuk guruş on iki akçe el-yevm gāibe-i mezbûre zimmetinde alacağımız kalmışdır deyüp müdde‘î-i vekîl-i mezbûr Mahmud Ağa’nın ber-vech-i muharrer verâset ve vekâlet müdde‘âlarını inkâr etmekle müdde‘î-i vekîl-i mezbûr Mahmud Ağa’dan da‘vâ-i mezkûrelerine mutâbık beyyine taleb olundukda udûl-i ahrâr-ı ricâl-i Müslimînden ve kazâ-i merkūm mülhakātından Atina kazâsı ahâlîsinden olup bu esnâda Âsitâne-i aliyye’den gelen Ali Ağa b. Mustafa ve Hurşid Ağa b. Hasan nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka sagīr-i müteveffâ-yı mezbûr Mehmed Nuri Bey müvekkile-i mezbûre Âişe Hatun’un dâmâdı müteveffâ-yı mezbûr Mustafa Bey b. Osman’ın firâşından hâsıl ve kerîmesi müteveffât-ı mezbûre Hadîce Hatun bt. Ömer’den mahâlle-i mezbûrede mütevellid olup ol vechile müvekkile-i mezbûre Âişe Hatun dahi sagīr-i müteveffâ-yı mezbûrun min-kıbeli’l-üm ceddesi ve vârisesi olmağla sagīr-i müteveffâ-yı mezbûrun verâseti ceddesi müvekkile-i mezbûre Âişe Hatun ile li-ebeveyn ammi oğulları işbu mezbûr Hasan Ağa ve karındaşı gāib-i mezbûr Mehmed Şakir Ağa’ya münhasıra ve onlardan gayrı vârisi ve terekesine müstahıkk-ı âharı olduğu ma‘lûmumuz değildir, biz bu husûsa bu vech üzere şâhidleriz ve şehâdet dahi ederiz deyü her biri müttefiku’l-lafz ve’l-ma‘nâ edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müvekkile-i mezbûre Âişe Hatun’un dahi verâset-i mezkûresine ba‘de’l-hükm mezbûr Hasan Ağa’nın kabzını mu‘terif olduğu meblağ-ı mezkûr beş bin dokuz yüz altmış dört guruşun südüsü olan meblağ-ı merkūm dokuz yüz doksan dört guruşu müvekkile-i cedde-i mezbûre Âişe Hatun için vekîli oğlu müdde‘î-i mezbûr Mahmud Ağa’ya edâ ve teslîme mezbûr Hasan Ağa’ya tenbîh olunduğu tescîl ve huzûr-ı [âlîlerine i‘lâm olundu]. Fî 15 B sene [12]73. Ser-ketebe.