Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 59 Hüküm no: 35 Orijinal metin no: [6a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi’ye babası Hasan Ağa’dan intikal eden terekeden borç alan Mustafa Faik Efendi’nin borcunu ödeyerek gedik hissesini geri alması Hademe-i âsafîden Bekir Ağa kaydıyla Tırnovili Osman Kavvâs’a teslîm. İstanbul’da vâki‘ Sultân Ahmed Han -aleyhi’r-rahmetü ve’l-gufrân- hazretleri câmi‘-i şerîfi civârında Güngörmez mahâllesinde sâkin iken bundan akdem vefât eden Bezzâzistânî es-Seyyid Hasan Ağa’nın sulbî oğlu mukaddemâ sagīr ve hâlâ kebîr sâhib-i arzuhâl es-Seyyid Ahmed Efendi mahfil-i şer‘iyyâtda derûn-ı arzuhâlde mezkûrü’l-ism Mâliye Hazîne-i celîlesi ketebesinden Mustafa Faik Efendi b. Numan muvâcehesinde yedimde olup bin iki yüz altmış dokuz senesi Recebi’l-ferd gurresi târîhiyle müverraha ve ol târîhde askerî kassâmı hâlâ Anadolu pâye-i celîlesiyle mübeccel semâhatlü el-Hâc Ahmed Şükrü Efendi hazretlerinin imzâ ve hatemini hâviye işbu bir kıt‘a inâne[idâne] hücceti nâtıka olduğu üzere merkūm Mustafa Faik Efendi benim pederim müteveffâ-yı merkūmdan mevrûs malımdan ve hâl-i suğrumda li-ecli’l-idâne vasiyy-i mansûbum olan gāib ani’l-meclis Mehmed Said Ağa b. Osman’ın yedinden istidâne ve kabz ve umûruna sarfla istihlâk eylediği iki bin beş yüz guruş ve târîh-i hüccet-i mezkûreden i‘tibâren iki senelik bâ-devr-i şer‘î ilzâm-ı ribhi olan yedi yüz elli guruş ki bana zimmetinde deyni olan cem‘an üç bin iki yüz elli guruş mukābelesinde mahrûse-i Galata’ya muzâfe Rumelihisarı nâm mahâlde Alibey mahâllesinde Hamam Çarşısı’nda her biri ma‘lûmü’l-hudûd bir bâb bakkāl dükkân ile tahtında vâki‘ bir bâb mahzen ve derûnunda mevcûde beyne’l-esnâf gedik ta‘bîr olunur ber-mûceb-i defter-i müfredât vakıf âlât-ı lâzıme-i ma‘lûmenin yüz yirmi sehim i‘tibârıyla bâ-temessük-i mütevellî bi’l-icâreteyn mutasarrıf olduğu otuz sehim hisse-i şâyi‘asını bâ-re’y-i mütevellî bana vefâen ferâğ ve tefvîz eylediğinde vasiyy-i gāib-i merkūm dahi ber-vech-i muharrer bi’l-vesâye tefevvüz ve kabûl edip [6b] ve meblağ-ı mecmû‘-ı mezkûre kız karındaşım Şerîfe Hafize Hatun bt. Hasan ile gāibûn ani’l-meclis Yüzbaşı tekāüdlerinden Mehmed Maksud Ağa b. Nureddin ve Hüseynici Agob v. İlya ve Hüseynici Haçador v. Artin dahi tarafeynden bi’l-emr ve’l-kabûl kefâlet-i mutlakā-i sahîha-i şer‘iyye ile başka başka kefil ve zâmin olmuşlar idi. El-hâletü hâzihi meblağ-ı mecmû‘-ı mezkûr üç bin iki yüz elli guruşu hâlâ bana edâ ve îfâ ve zikr olunan otuz sehim hisse-i şâyi‘ayı bâ-re’y-i mütevellî geri tefevvüze mezbûr Mustafa Faik Efendi’ye tenbîh olunmak murâdımdır deyü vasiyy-i gāib-i mezbûrun tevkîl ve ihâlesiyle da‘vâ etdikde ol dahi cevâbında kazıyye minvâl-i meşrûh üzere olduğunu ve mazmûn-ı hüccet-i merkūmeyi bi-tamâmihî tâyi‘an ve kat‘iyyen ikrâr u i‘tirâf etmeğin mûcebince meblağ-ı mecmû‘-ı mezkûr üç bin iki yüz elli guruşu müdde‘î-i mezbûr es-Seyyid Ahmed Efendi’ye edâ ve îfâ ve mârrü’z-zikr otuz sehim hisse-i şâyi‘a-i merkūmeyi bâ-re’y-i mütevellî geri tefevvüze mezbûr Mustafa Faik Efendi’ye tenbîh olunduğu huzûr-ı [âlîlerine i‘lâm olundu]. Fî 16 Ş sene [1]273. Ser-ketebe.