Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 60 Hüküm no: 36 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm Hatun’un alacak davasında anlaşma sağlanması Topkapılı Ahmed Kavvâs’a teslîm Ma‘rûz, İstanbul’da Sofular mahâllesinde sâkine bâ‘isetü’l-i‘lâm mu‘arrefetü’z-zât Ümmügülsüm Hatun bt. Ali mahfil-i şer‘iyyâtda Taşçı esnâfından Hüseyin Ağa b. Hasan ve zevcesi zât-ı mu‘arrefe Kamile Hatun bt. Abdullah muvâcehelerinde yedimde olan işbu bir kıt‘a i‘lâm-ı şer‘îde tafsîlen zikr ü beyan olunduğu üzere zevcân-ı mezbûrâna bundan akdem malımdan îdâ‘ ve teslîm eylediğim iki bin guruş kıymetli altın üzerine masnû‘ bir gül yüzük ve yedi yüz guruş kıymetli bir hilâlî koyun sâ‘ati ve üç yüz kıymetli bir havluyu bana redd ü teslîmden ibâ vü imtinâ‘ eder olmağla suâl olunup zikirleri mesbûk yüzük ve sâ‘at ve havlu mevcûde ise a‘yânını ve müstehleke ise ba‘de’s-sübût kıymetleri olan cem‘an üç bin guruşu bi-tarîkı’d-damân hâlâ bana edâ ve teslîme zevcân-ı mezbûrân Hasan Ağa ve Kâmile Hatun’a tenbîh olunmak murâdımdır deyü tasaddî eylediğim da‘vâmdan bâ-tavassut-ı muslihîn zevcân-ı mezbûrân ile bi’t-tav‘ ve’r-rızâ an-inkâr bin iki yüz yirmi guruş üzerine ba‘de-akdi’l-musâlaha ve’l-kabûl bedel-i sulh-ı mezkûr bin iki yüz yirmi guruşu meclis-i sulhda kable müfârakati’l-eydân bana teslîm eylediklerinde ben dahi yedlerinden ahz ü kabz eylediğimden sonra meblağ-ı merkūm bin iki yüz yirmi guruşun üç yüz yirmi guruşunu zevcân-ı mezbûrân zimmetinde bâ-i‘lâm-ı şer‘î seviyyen deynim olan üç yüz guruşa mahsûben zevcân-ı mezbûrâna def‘ ü teslîm edip onlar dahi yedimden ahz ü kabz etmeleriyle ziyâde müdde‘âma ve bi’l-cümle husûs-ı mezkûra müte‘allıka da‘vâdan ben zevcân-ı mezbûrân Hasan Ağa ve Kâmile Hatun’un zimmetlerini ibrâ ve iskāt eylediğimde onlar dahi kezâlik bi’l-cümle husûs-ı merkūma müte‘allıka da‘vâdan benim zimmetimi ibrâ ve iskāt ve tarafeynden her birimiz ber-vech-i muharrer âharın ibrâsını kabûl eyledik deyü mukırra-i mezbûre Ümmügülsüm Hatun’un bi’l-cümle takrîr-i meşrûhunu zevcân-ı mezbûrân Hasan Ağa ve Kâmile Hatun tasdîk ve tahkīk eyledikleri tescîl ve bi’l-iltimâs huzûr-ı [âlîlerine i‘lâm olundu]. Fî 9 Ş sene [1]273. el-Hâc İbrahim.