Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 61 Hüküm no: 37 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap Mehmed Ağa ile Mehmed Emin Ağa’nın birbirlerinin zimmetlerini ibra etmeleri Müdde‘î-i mezbûr Şerîf Mehmed Ağa’ya teslîm. Ma‘rûz, Kasab esnâfından Şerîf Mehmed Ağa b. Ali nâm kimesne mahfil-i şer‘iyyâtda yine esnâf-ı merkūmeden bâ‘isü’l-i‘lâm Mehmed Emin Ağa b. el-Hâc Haşim muvâcehesinde yedimde olup işbu sene-i mübâreke Cumâdelûlâsının dokuzuncu günü târîhiyle müverrah Salı günü huzûr-ı hazret-i fetvâpenâhîde ma‘kūd meclis-i şer‘-i münîrde murâfa‘adan verilen işbu bir kıt‘a i‘lâm-ı şer‘î tafsîlen zikr ü beyan olunduğu üzere mezbûr Mehmed Emin Ağa zimmetinde lahm-ı ganem semeninden mahkûmün-bih alacak hakkım olan dokuz yüz bin dört yüz seksen dokuz guruşdan rızâmla meccânen fâriğ olduğumdan mâ‘adâ mezbûr Mehmed Emin Ağa işbu târîh-i i‘lâma gelince beynimizde cereyân eden cemî‘ ahz ü i‘tâ ve bi’l-cümle medfû‘ât ve makbûzâtımız hesâbını mezbûr Mehmed Emin Ağa benimle sehv ü galatdan ârî yegân yegân sahîhan rü’yet edip ahadühümâ âharın yed ve zimmetimizde bir akçe ve bir habbe hakkımız ve alacağımız dahi zuhûr etmemekle meblağ-ı merkūm dokuz bin dört yüz seksen dokuz guruşun mutâlebesine ve işbu târîhe gelince sâir cemî‘ hukūk-ı şer‘iyyeye müte‘allıka âmme-i de‘âvî ve mutâlebât ve kâffe-i eymân ve muhâsamâtdan mezbûr Mehmed Emin Ağa’nın zimmetini ibrâ-i âmm-ı sahîh-i şer‘î ile ibrâ ve iskāt eylediğimde ol dahi kezâlik bi’l-cümle husûs-ı mezkûra ve işbu târîh-i i‘lâma gelince sâir cemî‘ hukūk-ı şer‘iyyeye müte‘allıka âmme-i de‘âvâ ve mutâlebât ve kâffe-i eymân ve muhâsamâtdan benim zimmetimi ibrâ-i âmm-ı sahîh-i şer‘î ile ibrâ ve iskāt ve tarafeynden her birimiz ber-vech-i muharrer âharın ibrâsını kabûl eyledik deyü mukırr-ı merkūm Şerîf Mehmed Ağa’nın sâdır olan bi’l-cümle kelimât-ı meşrûhasını mezbûr Mehmed Emin Ağa vicâhen tahkīk ve şifâhen tasdîk eylediği ve bi’l-iltimâs huzûr-ı [âlîlerine i‘lâm olundu]. Fî 2 Ş sene [1]242.