Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 61 Hüküm no: 38 Orijinal metin no: [6b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçük Ahmed Efendi’nin Hekim Hasan Efendi’de olan borcunu ödemesi hususunda tenbihte bulunulması Kasımpaşalı Ali Kavvâs’a teslîm Hekim Hasan Efendi b. Mehmed b. Abdullah nâm kimesne tarafından husûs-ı âti’l-beyanda taleb ve da‘vâ ve ahz ü kabza vekîl-i müseccel-i şer‘îsi mahrûse-i Galata Kısmet-i Askeriye Mahkemesi muhzırânından derûn-ı arzuhâlde mezkûrü’l-ism es-Seyyid İsmail Efendi b. el-müteveffâ es-Seyyid Ömer Ağa b. Ahmed nâm kimesne mahfil-i şer‘iyyâtda sâhib-i arzuhâl berber esnâfından Küçük Ahmed Efendi b. [7a] Ali <> muvâcehesinde yedimde olup bin iki yüz altmış iki senesi şehr-i Rebî‘ülâhir gurresi târîhiyle müverraha ve ol târîhde mahrûse-i merkūme kādısı ve hâlâ Mekke-i mükerreme pâyelülerinden İmam-ı evvel-i hazret-i Sultânî esbak Mustafa Nuri Efendizâde fazîletlü Ahmed Nazif Efendi’nin imzâsıyla mümzât ve hatemiyle mahtûme işbu bir kıt‘a idâne hücceti nâtıka olduğu üzere bundan akdem vefât eden berber Abdülkadir Ağa b. Mustafa b. Abdullah nâm kimesne müvekkilim mezbûrun malından ve vekîli pederim müteveffâ-yı mezbûr es-Seyyid Ömer Ağa’nın hayâtında yedinden istidâne ve kabz ve umûruna sarfla istihlâk eylediği bin guruş ile meblağ-ı merkūmün târîh-i hüccet-i merkūmeden <> i‘tibâren bir senelik bâ-devr-i şer‘î ribh-i mülzemi olan yüz elli guruş ki cem‘an bin yüz elli guruş deynine târîh-i hüccet-i merkūmede mezbûr Ahmed Efendi ile işbu hâzır bi’l-meclis el-Hâc Hasan Ağa b. Veliyüddin ve gāibân ani’l-meclis Berber el-Hâc Mehmed Eşref Ağa b. Abdurrahman ve Gümrük hademesinden Mahmud Efendi b. Mehmed nâm kimesnelerden her biri tarafeynden bi’l-emr ve’l-kabûl kefâlet-i mutlakā-i sahîha-i şer‘iyye ile müte‘âkiben kefil ve zâmin olduklarından sonra ben nemâ-i mezkûru medyûn-ı asil-i müteveffâ-yı merkūmdan hayâtında bi’l-vekâle ahz ü kabz etmemle mâ‘adâ asl-ı mâl-ı mekfûlün-bih-i mezkûr bin guruşu kefâlet-i mahkiyesine binâen işbu Ahmed Efendi’den bi’l-vekâle taleb ederim deyü ba‘de’d-da‘vâ ve’l-istintâk, ol dahi cevâbında müdde‘î-i vekîl-i mezbûr es-Seyyid İsmail Efendi’nin ber-vech-i muharrer müdde‘âsını inkâr etmekle müdde‘î-i vekîl-i mezbûr es-Seyyid İsmail Efendi ber-minvâl-i muharrer müdde‘âsını ve mazmûn-ı hüccet-i mezkûreyi mahkeme-i mezbûre muhzırânından Hüseyin Hamid Efendi b. Mehmed Emin ve el-Hâc Ahmed Efendi b. es-Seyyid Ömer nâm kimesneler şehâdetleriyle bi’l-muvâcehe ber-nehc-i şer‘î isbât etdikde mezbûr Ahmed Efendi dahi şâhidân-ı mezbûrân-ı âdiller eyledikleri şehâdet-i şer‘iyyelerinde sâdıklar olduklarını tasdîk etmeğin mûcebince meblağ-ı mekfûlün-bih-i mezkûr bin guruşu müvekkil-i mezbûr için vekîl-i müdde‘î-i mezbûr es-Seyyid İsmail Efendi’ye bi-hükmi’l-kefâle edâ ve teslîme mezbûr Ahmed Efendi’ye tenbîh olunduğu huzûr-ı [âlîlerine i‘lâm olundu]. Fî 16 Ş sene [12]73. Raşid.