Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 62 Hüküm no: 39 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alacak davasında anlaşma sağlanması Arabgirli Feyzi Çavuş’a teslîm. Fi’l-asl vilâyet-i Rumeli’de Keşan kazâsı ahâlîsinden olup el-yevm İstanbul’da Küçük Langa nâm mahâlde müsâfereten sâkine sâhibe-i arzuhâl mu‘arrefetü’z-zât Kadire Hatun bt. Hüseyin mahfil-i şer‘iyyâtda yine kazâ-i mezkûr ahâlîsinden derûn-ı arzuhâlde isimleri mezkûr kezâlik zâtları mu‘arrefeler Âmine ve li-ebeveyn kız karındaşı Fâtıma ibnetey Yusuf nâm hatunlar muvâcehelerinde mezbûre Âmine Hatun’un zevci İsmail Ağa b. Mesud hâzır olduğu hâlde mezbûretân Âmine ve Fâtıma Hatunlar ile hâzır-ı mezbûr İsmail Ağa’dan her biri işbu târîh-i i‘lâmdan iki sene mukaddem kazâ-i mezkûrda sâkinler iken Der-aliyye’de benim için bir menzil iştirâ etmek üzere malımdan on beş bin guruşumu bi’l-ma‘iyye ahz ü kabz etmişler iken bana menzil iştirâ etmediklerinden mâ‘adâ medfû‘um olan meblağ-ı merkūm on beş bin guruşu dahi bana redd ü teslîm etmeyip fuzûli ve bi-gayrı hakkın kendi umûrlarına sarfla istihlâk etmeleriyle el-hâletü hâzihi merkūmetân Emine ve Fâtıma Hatunlar ile hâzır-ı mezbûr İsmail Ağa zimmetlerinde bi-tarîkı’d-damân alacak hakkım olan meblağ-ı mezkûr on beş bin guruş mezbûrûndan damânen taleb ederim deyü tasaddî eylediğim da‘vâmdan bâ-tavassut-ı muslihîn mezbûrûn ile bi’t-tav‘ ve’r-rızâ bin guruş üzerine an inkâr sulh olduğumda onlar dahi sulh-ı mezkûru ba‘de’l-kabûl bedel-i sulh-ı merkūmdan mâ‘adâ ziyâde müdde‘âma ve bi’l-cümle husûs-ı mezkûra müte‘allıka da‘vâdan mezbûretân Âmine ve Fâtıma Hatunlar ile hâzır-ı mezbûr İsmail Ağa’nın zimmetlerini ibrâ-i sahîh-i şer‘î ve iskāt-ı tâmm-ı sarîh-i mer‘î ile kabûllerini hâvî ibrâ ve iskāt eyledim deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr bin guruşu müdde‘î-i mezbûre Kadire Hatun’a bi’t-taleb edâ ve teslîme mezbûretân Âmine ve Fâtıma Hatunlar ile hâzır-ı mezbûr İsmail Ağa’dan her birine tenbîh olunduğu huzûr-ı [âlîlerine i‘lâm olundu]. Fî 21 Ş sene [1]273. el-Hâc İbrahim.