Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 63 Hüküm no: 40 Orijinal metin no: [7a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bedros’un miras davasında kardeşleri Kigork ve Toros’un zimmetlerini ibra etmesi Erzincanî Mehmed Çavuş’a teslîm. İstanbul hısnı ebvâbından Kumkapı dâhilinde ve Nişâncı mahâllesinde sâkin iken işbu târîh-i i‘lâmdan on dört sene mukaddem fevt olan teba‘a-i Devlet-i aliyye’den ve Doğramacı esnâfından Hacır v. Bedros v. Adam’ın verâseti zevce-i metrûkesi Rosık bt. Sahak ile sulbî kebîr oğulları Kigork ve Toros ve Bedros’a münhasıra ve ba‘dehû zevce-i merkūme Rosık dahi fevt olup verâseti sadr-ı kebîr oğulları Kigork ve Toros ve Bedros’a ba‘de’l-inhisâr sâhib-i arzuhâl merkūm Bedros mahfil-i şer‘iyyâtda derûn-ı arzuhâlde mezkûrü’l-ism merkūmân Kigork ve Toros muvâcehelerinde babam ve mûrisimiz müteveffâ-yı evvel-i mezbûr Hacır’ın hîn-i fevtinde terekesi olan mecmû‘u on dört bin yüz guruş kıymetli yün memlû üç minder ve altı duvar yasdığı ve dört aded döşek ve dört aded basma yorgan ve dört aded baş yasdığı ve kırk vakiye evânî-i nühâsiye ve anam müteveffât-ı sâniye-i [7b] merkūmenin dahi kezâlik hîn-i vefâtında terekesi olan mecmû‘u on bir bin guruş kıymetli yün memlû altı aded minder ve on basma duvar yasdığı ve elli vakiye evânî-i nühâsiyesini karındaşlarım merkūmân Kigork ve Toros fuzûlî ve bi-gayrı hakkın bi’l-ma‘iyye ahz ü kabz ve ketb ü ihfâ etmeleriyle suâl olunup kâffe-i eşyâ ve evânî-i nühâsiye-i muharrere-i mezkûrenin mevcûde ise a‘yânından ve müstehlek ise ba‘de’s-sübût kıymetleri olan meblağayn-ı mezkûreyn cem‘an yirmi beş bin yüz guruşdan sülüs hisse-i ırsiye-i şer‘iyyemi karındaşlarım merkūmândan bi’l-verâse damânen taleb ederim deyü da‘vâ eylediğimde, anamız müteveffât-ı sâniye-i merkūmenin evvelâ terekesi <> husûsunda karındaşlarım merkūmân Kigork ve Toros istintâk olunduklarında cevâblarında benim ber-vech-i muharrer müdde‘âmı inkâr edip sâniyen babamız müteveffâ-yı evvel-i merkūmün terekesi hakkında dahi lede’l-istintâk cevâblarında babamız müteveffâ-yı evvel-i merkūmun hîn-i fevtinde bi’l-cümle terekesi bâ-ma‘rifet-i şer‘-i şerîf tahrîr ve âhara bey‘ olunup bâ-defter-i kassâm esmân-ı hâsıla-i ma‘lûmesinden sen hisse-i ırsiye-i şer‘iyyeni ahz ü kabz etdikden sonra yedimizde olup bin iki yüz elli dokuz senesi Muharremü’l-haramı’nın yirmi sekizinci günü târîhiyle müverrah [ve] ol târîhde kassâm-ı askerî bulunan es-Seyyid Yahya Tevfik Efendi merhûmun imzâ ve hatemini hâvî işbu bir kıt‘a ibrâ hücceti nâtıka olduğu üzere husûs-ı mîrâsa müte‘allıka âmme-i de‘âvî ve kâffe-i mutâlebâtdan bizim zimmetimizi, biz dahi senin zimmetini tarafeynden her birimiz ibrâ-i sahîh-i şer‘î ile kabûlümüzü hâvî ibrâ ve iskāt etmiş idik deyü mazmûnu takrîr-i meşrûhlarına muvâfık hüccet-i merkūmeyi bi’l-ibrâz, eyledikleri def‘lerini ve mazmûn-ı hüccet-i mezkûreyi ben bi-tamâmihâ tâyi‘an ve kat‘iyyen ikrâr ve tasdîk edip mûcebince ba‘de-ibrâi’l-âm tasaddî eylediğim da‘vâ-i mezkûremle karındaşım merkūmâna bî-vech-i şer‘î mu‘ârazadan men‘ olunduğumdan sonra anam müteveffât-ı merkūmenin terekesinden hisse-i ırsiye da‘vâmdan bâ-tavassut-ı muslihîn karındaşlarım Kigork ve Toros ile bi’t-tav‘ ve’r-rızâ üç yüz guruş üzerine sulh olduğumda onlar dahi sulh-ı mezbûru ba‘de’l-kabûl bedel-i sulh-ı mezkûr üç yüz guruşun iki yüz guruşunu karındaşlarım merkūmâna bâ-tahvîl karzen deynim olan iki yüz guruşa takās ve mahsûb eylediğimde onlar dahi mukāssa ve kabûl ve bâkīsi olan yüz guruşu işbu meclis-i şer‘de bana def‘ ü teslîm eylediklerinde, ben dahi yedlerinden ahz ü kabz etmemle bi’l-cümle husûs-ı mezkûra müte‘allıka âmme-i da‘vâdan karındaşlarım merkūmânın zimmetlerini kabûllerini hâvî ibrâ ve iskāt eyledim deyü mukırr-ı merkūm Bedros’un bi’l-cümle takrîr-i meşrûhunu merkūmân Kigork ve Toros tasdîk ve tahkīk eyledikleri tescîl ve huzûr-ı [âlîlerine i‘lâm olundu]. Fî 10 Ş sene [1]273. el-Hâc İbrahim.