Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 65 Hüküm no: 41 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafize bt. Mehmed’in boşandığı eşi Mehmed Rıfaz Efendi’den çocukları için nafaka talebi Ma‘rûz, Mahrûse-i Galata’da Yolcuzâde mahâllesinde sâkine mu‘arrefetü’z-zât Şerîfe Hafize Hanım bt. es-Seyyid Mehmed Emin Ağa b. İsmail’in li-ebeveyn er karındaşı tarafından husûs-ı âti’l-beyanda vekîl-i müseccel-i şer‘îsi Hırka-i sa‘âdet hademesinden es-Seyyid Mehmed Rıfat Efendi mahfil-i şer‘iyyâtda müvekkile-i mezbûrenin zevc-i sâbıkı Enderûn-ı hümâyûndan muhrec Mehmed İzzet Bey b. İsmail muvâcehesinde müvekkile-i mezbûrenin vâlidesi kezâlik mu‘arrefetü’z-zât Şerîfe Âmine Hanım bt. el-Hâc Ali hâzır olduğu hâlde müvekkile-i mezbûre Şerîfe Hafize Hanım’ın mûmâ-ileyh Mehmed İzzet Bey ile mukaddemâ zevciyet beynlerinde kāime iken mûmâ-ileyhin firâşından hâsıl ve müvekkilem mezbûreden mütevellid ve bi-hakkı’l-hıdâne hâlâ hacr ve terbiyesinde işbu hâzır bi’l-meclis tahmînen dört buçuk yaşında sulbî oğlu Mehmed Hayri nâm sagīr ile işbu sene-i mübâreke Muharremü’l-haramı’nın on beşinci günü vefât eden sulbiye kızı Fâtıma nâm sagīrenin nafaka ve kisve-bahaları için yedimde olup bin iki yüz yetmiş senesi Şevvâli’l-mükerremi’nin yirmi dokuzuncu günü târîhiyle müverraha [ve] ol târîhde mahrûse-i merkūme kādısı olup hâlâ İstanbul pâye-i celîlesiyle mübeccel Sıdkızâde hafîdi Mehmed Sıddık Bey Efendi hâzretlerinin imzâ ve hatemi hâviye işbu bir kıt‘a nafaka hücceti nâtıka olduğu üzere pederleri mezbûr Mehmed İzzet Bey üzerine kıbel-i şer‘den farz ve takdîr olunmuş olan beher şehr yüz yirmi beş guruşdan sagīre-i müteveffâ-yı mezbûrenin sene-i sâbıkā ya‘ni bin iki yüz yetmiş iki senesi Zilka‘de-i şerîfesi’nin on beşinci gününden işbu sene-i mübâreke Muharremü’l-haramı’nın on beşinci gününe gelince iki ay müddetden nafaka-i müstedâne-i müterâkimesi olan cem‘an iki yüz elli guruş ve sagīr-i mezbûr Mehmed Hayri’nin dahi mârrü’z-zikr bin iki yüz yetmiş iki senesi Zilka‘deti’ş-şerîfesi’nin on beşinci gününden işbu sene-i mübâreke Recebi’l-ferdi gāyetine gelince dokuz buçuk ay müddetde nafaka-i müstedâne-i müterâkimesi olan cem‘an bin iki yüz elli guruş ki min-haysü’l-mecmû‘ bin beş yüz guruşu merkūm Mehmed İzzet Bey’den bi’l-vekâle hâlâ taleb ederim deyü ba‘de’d-da‘vâ ve’l-istintâk, ol dahi cevâbında kazıyye minvâl-i muharrer üzere olduğunu bi-tamâmihâ tâyi‘an ve kat‘iyyen ikrâr u i‘tirâf etmeğin mûcebince meblağ-ı mecmû‘-ı mezkûr bin beş yüz guruşu müvekkile-i mezbûre Şerîfe Hafize Hanım için vekîli karındaşı müdde‘î-i mezbûr Mehmed Rıfat Efendi’ye hâlâ edâ ve teslîme mezbûr Mehmed İzzet Bey ilzâm olunduğu tescîl ve huzûr-ı [âlîlerine i‘lâm olundu]. Fî 19 Ş sene [1]273. Edhem.