Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 66 Hüküm no: 42 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tevekkel hamamı sahibi Mehmed Sadık Ağa’nın Mehmed Bey’de olan alacağını tahsil ederek rehin olan menzili iade etmesi Vekîl-i mezbûra teslîm İstanbul’da Aksaray civârında vâki‘ Tevekkel Hamamı mutasarrıfı bâ‘isü’l-i‘lâm el-Hâc Mehmed Sadık Ağa b. Mustafa nâm kimesne mahfil-i şer‘iyyâtda Redîf Asâkir-i Nizâmiye-i şâhâne İkinci Alayının Birinci Taburu Kolağalığı’ndan muhrec Mehmed Bey b. Ahmed muvâcehesinde yedimde olup bin iki yüz yetmiş senesi Saferi’l-hayrı’nın altıncı günü târîhiyle müverraha İstanbul’da Mahmudpaşa Mahkemesi’nden verilen işbu bir kıt‘a mübâya‘a hâmişi [8a] nâtık olduğu üzere mezbûr Mehmed Bey zimmetinde malımdan ve yedimden istidâne ve kabz ve umûruna sarfla istihlâk eylediği on bir bin guruş ile mebâliğ-i mezkûrun bir senelik bâ-devr-i şer‘î ilzâm-ı ribhi olan on bin altı yüz elli guruş ki cem‘an on iki bin altı yüz elli guruş bana zimmetinde deyni mukābelesinde müstakillen yedinde malı ve mülkü olan medîne-i hazret-i Ebâ Eyyûbe’l-ensârî -radıye anhü Rabbihi’l-bârî- mahâllâtından Düğmeciler mahâllesinde Oluklubayır nâm mahâlde vâki‘ ma‘lûmü’l-hudûd ve’l-müştemilât bir bâb mülk menzilini rehin vaz‘ ve bana teslîm eylediğinde, ben dahi irtihân ve tesellüm ve kabz ü kabûl etmemle meblağ-ı mecmû‘-ı mezkûr on iki bin altı yüz elli guruş ve bana bir re’s câriye bey‘ ve teslîm etmek üzere malımdan mezbûr Mehmed Bey’e bin guruş def‘ ü teslîm eylediğimde, ol dahi yedimden vech-i muharrer üzere ahz ü kabz etmiş ise de bey‘-i mezkûr mün‘akid olmadığına binâen meblağ-ı mezkûr bin guruş ki min-haysü’l-mecmû‘ mezbûr Mehmed Bey zimmetinde işbu bir kıt‘a i‘lâm-ı şer‘î mantûkunca alacak hakkım olan on üç bin altı yüz elli guruşun dört bin altı yüz elli guruşunu rızâmla hat ve tenzîl edip bâkīsi olan dokuz bin guruşu mezbûr Mehmed Bey’in emir ve tevkîliyle gāibetü ani’l-meclis Âişe Sıdıka Hanım bt. el-Hâc Mehmed’in vekîl-i müsbet-i şer‘îsi işbu hâzır bi’l-meclis Konyalı Mehmed Ağa b. Ahmed yedinden tamâmen ve kâmilen ahz ü kabz ve istîfâ-yı hak eylediğimden sonra menzil-i mezkûru rehniyetden fekk ü tahlîs ve mezbûr Mehmed Bey’e redd ü teslîm edip ol dahi yedimden tesellüm ve kabz ve kabûl etmekle el-hâletü hâzihi ben vech-i muharrer hatt ü tenzîl eylediğim meblağ-ı mezkûr dört bin altı yüz elli guruşun mutâlebesine ve bi’l-cümle husûs-ı merkūma ve işbu târîh-i i‘lâma gelince sâir cemî‘ hukūk-ı şer‘iyyeye müte‘allıka de‘âvîden ben mezbûr Mehmed Bey’in zimmetini, ol dahi kezâlik bi’l-cümle husûs-ı merkūma ve derûn-ı i‘lâmda muharrer olduğu vechile inkârıma mukārin benden tasaddî eylediği on sekiz bin guruş kıymetli bir re’s Çerkes câriye semeni da‘vâsından meccânen fâriğ olup mütâlebe ve işbu târîh-i i‘lâma gelince sâir cemî‘ hukūk-ı şer‘iyyeye müte‘allıka âmme-i de‘âvîden benim zimmetimi tarafeynden her birimiz ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik deyü mukırr-ı mezbûr el-Hâc Mehmed Sadık Ağa’nın sâdır olan bi’l-cümle takrîr-i meşrûhunu mezbûr Mehmed Bey ile hâzır-ı vekîl-i mezbûr Mehmed Ağa’dan her biri bi’l-asâle ve bi’l-vekâle tasdîk ve tahkīk eyledikleri tescîl ve huzûr-ı [âlîlerine i‘lâm olundu]. Fî 19 Ş sene [1]273. Ser-ketebe