Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 67 Hüküm no: 43 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhallebici Mustafa Ağa’nın hizmet bedelinden dolayı olan borcunu ödemesi hususunda Mehmed Ağa’ya tenbih olunması Tophaneli Hasan Zabtiye kaydıyla Karagümrüklü İsmail Zabtiye’ye teslîm. Muhallebici esnâfından bâ‘isü’l-i‘lâm Mustafa Ağa b. Abdülhalim nâm kimesne mahfil-i şer‘iyyâtda yine esnâf-ı merkūmeden Mehmed Ağa b. Yusuf nâm kimesne muvâcehesinde ben mezbûr Mehmed Ağa ile yevmî yedişer guruş ücret tesmiyesiyle işbu sene-i mübâreke Cumâdelûlâsı’nın on yedinci gününden sene-i mezkûre Recebi’l-ferdinin yirmi dördüncü gününe gelince yetmiş üç gün müddet mezbûr Mehmed Ağa’nın yanında ber-mu‘tâd hizmet ve ba‘dehâ müfârakat etmemle ecr-i müsemmâ-yı mezkûrumdan müddet-i mezbûrede merkūm Mehmed Ağa zimmetinde müctemi‘ alacak hakkım olan beş yüz on bir guruşun elli altı guruşunu mezbûrun yedinden kabz ve istîfâ etmemle mâ‘adâsı olan dört yüz kırk beş guruşu mezbûr Mehmed Ağa’dan hâlâ taleb ederim deyü da‘vâ etdikde ol dahi cevâbında müdde‘î-i mezbûr Mustafa Ağa ber-minvâl-i muharrer beher yevm yedişer guruş ücret tesmiyesiyle ancak elli iki gün müddet benim yanımda ber-mu‘tâd hizmet ve ba‘dehû müfârakat etmekle ecr-i müsemmâ-yı mezkûrundan müddet-i merkūmede benim zimmetimde müctemi‘ alacak hakkı olan üç yüz altmış dört guruşunu elli altı guruşunu kabzını mu‘terif olduğu vechile mukaddemce müdde‘î-i mezbûra edâ ve îfâ etmemle bâkī zimmetimde müdde‘î-i merkūma ancak üç yüz iki guruş deynim kalmışdır deyüp müdde‘î-i mezbûrun ziyâde yirmi bir gün müddet hizmet müdde‘âsını inkâr etmekle müdde‘î-i mezbûr Mustafa Ağa ber-vech-i muharrer ziyâde hizmet müdde‘âsını isbâtdan izhâr-ı acz edip talebiyle mezbûr Mehmed Ağa bi’l-muvâcehe ber-nehc-i şer‘î tahlîf olunmağın mûcebince müdde‘î-i mezbûr Mustafa Ağa ziyâde hizmet müdde‘âsıyla merkūm Mehmed Ağa’ya bilâ-beyyine mu‘ârazadan ba‘de’l-men‘ mezbûr Mehmed Ağa’nın sâlifü’l-beyan ikrâr u i‘tirâfı üzere lâzım gelen meblağ-ı bâkī-i mezkûr üç yüz iki guruşu müdde‘î-i mezbûr Mustafa Ağa’ya edâ ve teslîme mezbûr Mehmed Ağa’ya tenbîh olunduğu mübâşiri Bâb-ı zabtiye neferâtından Tophaneli Hasan Ağa kulları yediyle huzûr-ı [âlîlerine i‘lâm olundu.] Fî 11 Ş sene [1]273. Hasan.