Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 68 Hüküm no: 44 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgancı esnafından Zarif Mustafa Paşa Hanı’nda sakin Ali ve Basmacı Mehmed’in han odabaşısı İbrahim Ağa aleyhindeki hırsızlık iddialarından men olunmaları İstanbul’da Ebulfeth Gāzî Sultân Mehmed Han -aleyhi’r-rahmetü ve’l-gufrân- hazretleri câmi‘-i şerîfi kurbünde Karaman-ı kebîr’de vâki‘ Zarif Mustafa Paşa Hanı’nda müsâfiren sâkinler Yorgancı esnâfından Ali b. Mehmed ve Basmacı esnâfından Mehmed b. İsmail nâm kimesneler mahfil-i şer‘iyyâtda han-ı mezkûrun Odabaşısı bâ‘isü’l-i‘lâm el-Hâc İbrahim Ağa b. Hüseyin muvâcehesinde mezbûr el-Hâc İbrahim Ağa işbu târîh-i i‘lâmdan on dokuz gün mukaddem han-ı mezkûrda müsteciren sâkinler olduğumuz odanın kuflünü feth ü güşâd edip derûnunda mevcûd ale’l-iştirâki’s-seviy müşterek malımız olan mecmû‘u doksan sekiz guruş kıymetli bir aded tencere ve bir aded demir tâbesi ve üç vakiye tarhana ve bir aded duhân tablası ve üç aded fincân ile nakid makāmında beher adedi yirmişer guruşdan cem‘an kırk guruşa mu‘âdil iki aded yirmilik kavâimi fuzûlî ve bi-gayrı hakkın ahz ü kabz etmekle suâl olunup eşyâ-yı muharrere-i mezkûre mevcûde [ise] a‘yânını ve müstehleke ise ba‘de’s-sübût kıymetleri olan meblağ-ı merkūm doksan sekiz guruşu ve nakd-i merkūm kırk guruş ki cem‘an yüz otuz sekiz guruşu mezbûr el-Hâc İbrahim Ağa’dan bi-tarîkı’d-damân hâlâ taleb ederiz deyü ba‘de’d-da‘vâ ve’l-istintâk, ol dahi cevâbında müdde‘âyân-ı merkūmân Ali ve Mehmed’in ber-vech-i muharrer müdde‘âlarını külliyen inkâr etmekle müdde‘âyân-ı merkūmân Ali ve Mehmed ber-minvâl-i muharrer müdde‘âlarını isbâtdan izhâr-ı acz birle istihlâf etdiklerinde merkūm el-Hâc İbrahim Ağa bi’l-muvâcehe ber-nehc-i şer‘î tahlîf olunmağın mûcebince müdde‘iyân-ı merkūmân da‘vâ-i mezkûreleriyle mezbûr el-Hâc İbrahim Ağa’ya bilâ-beyyine mu‘ârazadan men‘ olunduğu mübâşirleri Bâb-ı zabtiye neferâtından Nevşehirli Yusuf kulları yediyle huzûr-ı [âlîlerine i‘lâm olundu]. Fî 26 Ş sene [1]273. Mehmed Emin.