Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 69 Hüküm no: 46 Orijinal metin no: [8b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kigork v. Kasper’in Sarrâf Minas aleyhindeki alacak iddisının kanunsuz olduğu Ma‘rûz, Devlet-i aliyye teba‘asının Ermeni milletinden ve tütüncü esnâfından Kigork v. Kasper mahfil-i şer‘iyyâtda yine teba‘a-i Devlet-i aliyye’den ve millet-i merkūmeden bâ‘isü’l-i‘lâm Sarrâf Minas v. Karabet muvâcehesinde merkūm Minas’ın uşağı gāib ani’l-beled Artin v. Mardıros işbu târîh-i i‘lâmdan dört ay mukaddem malımdan kavâim-i nakdiyeye tebdîl ve bana teslîm etmek için meskûkât-ı nühâsiye-i düveliyeden olan beş yüz guruş nakdimi benden mutâlebe eylediğinde ben dahi gāib-i merkūm Artin işbu merkūm Minas’ın beyne’l-esnâf mu‘teber âdem bulunduğuna binâen nakd-i merkūm beş yüz guruşu gāib-i merkūma i‘tâ ve teslîm etdiğimde ol dahi yedimden vech-i muharrer üzere ahz ü kabz ve kabzını mübeyyin Ermeniyyü’l-imlâ işbu bir kıt‘a pusulayı dahi yedime i‘tâ etmiş iken meblağ-ı mezkûru kavâim-i nakdiyeye tebdîl etmediğinden mâ‘adâ bana redd ü teslîm dahi etmeyip fuzûlî ve bi-gayrı hakkın kendi umûruna sarfla istihlâk etmiş idi. El-hâletü hâzihi gāib-i merkūm Artin mücerred işbu merkūm Minas’ın uşağı olduğuna binâen meblağ-ı mezkûr beş yüz guruşu bana vermek üzere merkūm Minas’a cebr olunmak murâdımdır deyü tasaddî eylediği da‘vâsı takrîr-i meşrûhu üzere meşrû‘a ve iltifâta şâyân olmadığı kendüye tefhîm ve mûcebince da‘vâ-i mezkûresiyle merkūm Minas’a bî-vech-i şer‘î mu‘ârazadan men‘ olunduğu mübâşirleri Bâb-ı Zabtiye neferâtından Divriğli Bekir Ağa kulları yediyle huzûr-ı [âlîlerine i‘lâm olundu]. Fî 5 N sene [12]73. Mehmed Emin.