Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 70 Hüküm no: 47 Orijinal metin no: [8b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi ve Mehmed Efendi’nin murisleri Mehmed Arif’in terekesinden dolayı Zeliha Hanım aleyhindeki eşya davasında anlaşma sağlanması Mübâşiri Edirnekapılı Abdullah Çavuş’a teslîm. İstanbul’da Kadırga Limanı kurbünde Şehsuvar Bey mahâllesinde sâkin iken bin iki yüz yetmiş iki senesi şehr-i Rebî‘ülâhiri gurresinde vefât eden Dîvân-ı De‘âvî Çavuşlarından Postabaşı el-Hâc Mehmed Arif Ağa b. Ahmed b. Abdullah’ın verâseti zevce-i menkûha-i metrûkesi Zeliha Hanım bt. Halil ile sulbî [9a] kebîr oğlu Ali Efendi’ye ba‘de’l-inhisâr mezbûr Ali Efendi’nin sulbî kebîr oğulları Cerîde Muhâsebesi Kalemi ketebesinden sâhibey-i arzuhâl Ahmed Efendi ve Mehmed Efendi mahfil-i şer‘iyyâtda derûn-ı arzuhâlde mezkûretü’l-ism zevce-i mezbûre Zeliha Hanım tarafından husûs-ı âti’l-beyanda vekâlet-i âmme-i mutlakā-i sahîha-i şer‘iyye ile vekîl-i müseccel-i şer‘îsi mahâlle-i mezbûre İmamı Mehmed Sıdkı Efendi b. Ahmed muvâcehesinde mezbûr Ali Efendi hâzır olduğu hâlde büyük babamız mezbûr el-Hâc Mehmed Arif Ağa hâl-i hayât ve kemâl-i akl u sıhhatinde mahâlle-i mezbûrede vâki‘ sâkin olduğu menzilinde mevcûde yedinde emvâli olan mecmû‘u on altı bin beş yüz kırk guruş kıymetli yün memlû altı minder ve kıtık memlû yirmi dört aded ustûfe duvar yasdığı ve altı aded üstûfe mak‘ad ve iki aded İngiliz-kârî orta keçesi ve dört aded basma ve damisko yorgan ma‘a çarşeb ve iki aded çuka kapu perdesi ve yün memlû iki aded basma ve damisko döşek ma‘a çarşeb ve iki aded penbe memlû basma şilte ve iki aded ceviz çarşeb ve iki aded penbe memlû basma baş yasdığı ve iki aded penbe memlû basma yüz yasdığı ve iki aded işleme seccâde ve sagīr ve kebîr altı aded tencere ma‘a kapak ve dört aded kuşhâne tencere ma‘a kapak ve yirmi aded nühâs sahan ma‘a kapak ve iki aded ta‘âm sinisi ve iki aded sagīr sarı sini ve iki aded leğen ma‘a kapak ve iki aded kenârlı kadayıf tepsisi ve iki aded mum tepsisi ve iki aded âbdest leğeni ve iki aded câmeşûy leğeni ve iki aded helvahâne tencere ve iki aded nühâs su maşrabası ve iki aded nühâs su güğümü ve iki aded karavana ve iki aded su kazganını bin iki yüz altmış yedi senesi Recebi’l-ferdinin yirmi beşinci günü hibe-i sahîha-i şer‘iyye ile mahzar-ı şuhûdda bize seviyyen hibe ve temlîk ve teslîm eylediğinde biz dahi ber-minvâl-i muharrer iştirâk-i seviy üzere ittihâb ve temellük ve tesellüm ve kabz ve kabûl edip eşyâ ve evânî-i nühâsiye-i muharrere-i merkūme bizim seviyyen emvâl-i mevhûbemiz ve hakk-ı sırfımız olmuş iken müvekkile-i zevce-i mezbûre Zeliha Hanım zevci mezbûrun vefâtından sonra eşyâ ve evânî-i nühâsiye-i muharrere-i merkūmeyi yedimizden fuzûlî ve bi-gayrı hakkın ahz ü kabz etmekle suâl olunup eşyâ ve evânî-i nühâsiye-i muharre-i merkūme mevcûde ise a‘yânını ve müstehleke ise ba‘de’s-sübût kıymetleri olan meblağ-ı mezbûr on altı bin beş yüz kırk guruşu bi-tarîkı’d-damân hâlâ bana edâ ve teslîme zevce-i müvekkile-i mezbûreye izâfetle vekîl-i mezbûr Mehmed Sıdkı Efendi’ye tenbîh olunmak murâdımızdır deyü hâzır-ı mezbûr Ali Efendi’nin tasdîkiyle da‘vâ eylediğimizde vekîl-i mezbûr Mehmed Sıdkı Efendi dahi cevâbında bizim ber-minvâl-i muharrer müdde‘âmızı bi’l-vekâle inkâr edip ol vechile beynimizde münâza‘ât-ı kesîre ve muhâsamât-ı vefîre cereyân etmiş idi. El-hâletü hâzihi muslihûn tavassutuyla beynimiz ıslâh ve te’lîf olunup biz ber-vech-i muharrer tasaddî eylediğimiz da‘vâ-i mezkûremizden rızâmızla meccânen fâriğler olup mutâlebesine ve bi’l-cümle husûs-ı mezkûra müte‘allıka da‘vâdan biz pederimiz hâzır-ı mezbûr Ali Efendi ile ma‘an zevce-i müvekkile-i mezbûrenin zimmetini vekîl-i mezbûr Mehmed Sıdkı Efendi dahi kezâlik bi’l-cümle husûs-ı merkūma müte‘allıka da‘vâdan müvekkilesi zevce-i mezbûre Zeliha Hanım’a izâfetle bi’l-vekâle bizimle pederimiz hâzır-ı mezbûrun zimmetimizi tarafeynden her birimiz ibrâ-i sahîh-i şer‘î ile kabûlü hâvî ibrâ ve iskāt eyledik deyü müdde‘iyân-ı mukırrân-ı mezbûrân Ahmed Efendi ve Mehmed Efendi’nin sâdır olan bi’l-cümle takrîr-i meşrûhlarını mezbûr Ali Efendi bi’l-asâle ve vekîl-i mezbûr Mehmed Sadık Efendi bi’l-vekâle tasdîk ve tahkīk eyledikleri tescîl ve huzûr-ı [âlîlerine i‘lâm olundu]. Fî 20 Ş sene [12]73.