Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 71 Hüküm no: 48 Orijinal metin no: [9b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habibe Hatun’un Ahmed Necib Efendi’den bazı eşya talebi Mübâşir-i mezbûra teslîm. İstanbul’da Cerrâhpaşa mahâllesinde sâkine bâ‘isetü’l-i‘lâm mu‘arrefetü’z-zât Habibe Hübük Hanım bt. Mehmed İzzet Bâb-ı âlîlerine takdîm olunan arzuhâl bâlâsına sâdır olan fermân-ı âlîlerine imtisâlen mahfil-i şer‘iyyâtda hâlâ zevci Mâliye Hazîne-i celîlesi’nde Anadolu Masârıfât Muhâsebesi Odası ketebesinden Ahmed Necib Efendi b. Veliyüddin muvâcehesinde mezbûre Habibe Hübük Hanım’ın kız karındaşı Âişe Hanım bt. el-mezbûr Mehmed İzzet hâzıra olduğu hâlde zevcem merkūm Ahmed Necib Efendi’nin menzilinde mevcûde malım olup mahâllinde ma‘rifet-i şer‘le mu‘âyene olunan dört aded yün memlû minder ve kıtık memlû on aded duvar yasdığı ve iki aded al ihrâm mak‘ad ve üç aded koltuk yasdığı ve penbe memlû üç aded Merinoz yüz yasdığı ve üç aded penbe memlû Merinoz şilte ve yedisi Merinoz ve on ikisi Amerika bezi cem‘an on dokuz aded pencere perdesi ve bir oda keçesi ve bir nühâs mangal ma‘a göbek ve beş aded sahan ma‘a kapak ve bir şorba tası ve pilav tenceresi ma‘a kapak ve bir polat tepsi ve bir nühâs güğüm ve on aded fincân ma‘a zarf ve yün memlû iki aded döşek ma‘a çarşeb ve penbe memlû beş aded yorgan ma‘a çarşeb ve yün memlû dört aded baş yasdığı ve biri kebîr ve ikisi sagīr cem‘an üç aded şamdân ve bir döşek şiltesi ve bir erkân şiltesi ve yedi aded canfes anteri ma‘a şalvar ve dört aded soğuk bez anteri ma‘a şalvar ve on aded elvan yazma yemenî ve dört aded basma anteri ma‘a şalvar ve yirmi aded basmna boğça ve bir kahve örtüsü ve bir deste hoşâb kaşığı ve bir deste âdî kaşık ve bir kâse ve bir tahta iskemle ve bir faraş ve iki aded sîmli kemer ve bir sepet sandık ve bir mangal tahtası ve bir anbar ve bir tahta sandık ve çuka kaplı bir vaşak kürk ve beş aded çevre ve on aded uçkur ve bir sîm gülâbdân ma‘a buhurdan ve bir çuka kapu perdesi ve bir hamam takımı ve bir sofra ma‘a peşkir ve dokuz aded havluyu bana aynen redd ü teslîm etmiş idi. El-hâletü hâzihi kezâlik malım olup efendi-i mûmâ-ileyhin yedinde bi-a‘yânihâ mevcûde olan mecmû‘u üç bin yedi yüz beş guruş kıymetli bir arakiye seccâde ve bir kılâbdân işlemeli hamam bohçası ve bir kılâbdân işlemeli âbdest havlusu ve iki hilâlî don ma‘a gömlek ve iki incili nişân çevresi ve bir seccâde çevre ma‘a uçkur ve bir futa ve bir göğez çubuklu Lahor nişân şalı dahi aynen bana redd ü teslîme mezbûr Ahmed Necib Efendi’ye tenbîh olunmak matlûbumdur deyü da‘vâ etdikde ol dahi cevâbında kazıyye minvâl-i muharrer üzere olduğunu bi-tamâmihâ tâyi‘an ve kat‘iyyen ikrâr u i‘tirâf etmeğin mûcebince eşyâ-yı bâkiye-i muharrere-i mezkûreyi müdde‘iye-i merkūme Habibe Hübük Hanım’a bi-a‘yânihâ redd ü teslîme mezbûr Ahmed Necib Efendi’ye tenbîh olunduğu mübâşirleri Bâbıâlî çavuşlarından Çavuşzâde Mustafa Çavuş yediyle huzûr-ı [âlîlerine i‘lâm olundu]. Fî 23 Ş sene [1]273. Ser-ketebe.