Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 72 Hüküm no: 49 Orijinal metin no: [9b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Adile Hatun’un İbrahim Edhem Ağa’dan muhalaa usulüyle boşanması Ma‘rûz, Mahrûse-i Galata’ya muzâfe kasaba-i Tophane’de Fındıklı mahâllâtından Selime Hatun mahâllesinde sâkine bâ‘isetü’l-i‘lâm mu‘arrefetü’z-zât Adile Hatun bt. Hasan mahfil-i şer‘iyyâtda zevc-i muhâlı‘ı tüccârdan İbrahim Edhem Ağa b. İbrahim muvâcehesinde mezbûr İbrahim Edhem Ağa’nın bir guruş mehr-i müeccel tesmiyesiyle zevc-i dâhilim olup, lâkin beynimizde hüsn-i mu‘âşeretimiz olmamağla mezbûrun zimmetinde mütekarrir ve ma‘kūdün-aleyh mehr-i müeccel-i mezkûr alacak hakkım olan bin bir guruş ile nafaka-i iddet-i mu‘ayyene-i ma‘lûmem üzerlerine [ve] meûnet-i süknâm dahi kendi üzerime olmak üzere zevcim mezbûr İbrahim Edhem Ağa <> ile muhâla‘a-i sahîha-i şer‘iyye ile hul‘ olduğumda ol dahi hul‘-ı mezkûru ba‘de’l-kabûl hukūk-ı zevciyete ve mezbûr İbrahim Edhem Ağa zimmetinde cihet-i karzdan alacak hakkım olan iki yüz guruşdan mâ‘adâ ibtidâ-yı zevciyetimizden işbu târîh-i i‘lâma gelince sâir cemî‘ hukūk-ı şer‘iyyeye müte‘allıka da‘vâdan ben mezbûr İbrahim Edhem Ağa’nın zimmetini, ol dahi kezâlik hukūk-ı zevciyete ve ibtidâ-yı zevciyetimizden işbu târîh-i i‘lâma gelince sâir cemî‘ hukūk-ı şer‘iyyeye müte‘allıka da‘vâdan benim zimmetimi tarafeynden her birimiz bi’t-tav‘ ve’r-rızâ ibrâ-i sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik deyü ba‘de’l-ikrâr ve’t-tasdîk ibrâdan müstesnâ meblağ-ı merkūm iki yüz guruşu müdde‘iye-i mezbûre Adile Hatun’a edâ ve teslîme mezbûr İbrahim Edhem Ağa ta‘ahhüd eylediği tescîl ve huzûr-ı [âlîlerine i‘lâm olundu]. Fî 16 Ş sene [1]273. Akif, tesvîdden kayd.