Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 73 Hüküm no: 50 Orijinal metin no: [9b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa ve Emine Hanım’ın, Fatıma Hanım aleyhinde miras davasında bulunmaktan men olunmaları Mübâşiri hademe-i Âsafî’den Tevfik Ağa’ya teslîm Ma‘rûz, İstanbul’da Şehremini kurbünde Denizabdal mahâllesinde sâkin iken işbu târîh-i i‘lâmdan iki sene mukaddem vefât eden Şimkeş [Simkeş] Mehmed Efendi b. Mehmed Emin b. Abdullah nâm kimesnenin verâseti zevce-i menkûha-i metrûkesi Zenciye Fâtıma Kadın bt. Abdullah ile li-ebeveyn er karındaşı evlâdı Mehmed Ağa ve Emine Hatun ibneyi’l-müteveffâ Ahmed’e münhasıra ve tashîh-i mesele-i mîrâsları dört sehmden olup sihâm-ı merkūmeden bir sehmi zevce-i mezbûreye ve iki sehmi mezbûr Mehmed Ağa ve bâkī bir sehmi dahi mezbûre Emine Hatun’a isâbeti tahakkukundan sonra sâhibey-i arzuhâl mezbûr Mehmed Ağa zâtı mu‘arrefe merkūme Emine Hatun hâzıra olduğu hâlde mahfil-i şer‘iyyâtda zikri âtî bir bâb mülk menzilin dört sehim i‘tibârıyla üç sehim hisse-i şâyi‘asına el-yevm vaz‘-ı yedi inde’ş-şer‘i’l-enver zâhir ve mütehakkık olan derûn-ı arzuhâlde mezkûretü’l-ism kezâlik mu‘arrefetü’z-zât zevce-i mezbûre Fâtıma Kadın muvâcehesinde mahâlle-i mezbûrede kâin ma‘rifet-i şer‘le [10a] mu‘âyene olunan ma‘lûmü’l-hudûd ve’l-müştemilât bir bâb mülk menzilin dört sehim i‘tibârıyla bir sehim hisse-i şâyi‘ası mezbûre Fâtıma Kadın’ın şirâen ve bâkī üç sehim hisse-i şâyi‘ası dahi mûrisimiz müteveffâ-yı mezbûr Mehmed Efendi’nin hayâtında ile’l-vefât müstakillen yedinde mülkü iken mezbûr Mehmed Efendi fevt ve menzil-i mezbûrun üç sehim hissesi dört sehim i‘tibârıyla bir sehim hissesi zevce-i mezbûreye ve üç sehmi dahi benimle hâzıra-i mezbûre Âmine Hatun’a mevrûs olmuş iken zevce-i mezbûre Fâtıma Kadın menzil-i merkūmun ziyâde bir sehim hisse-i şâyi‘asını fuzûlî ve bi-gayrı hakkın zabt ve hâlâ vaz‘-ı yed eder olmağla suâl olunup menzil-i mezkûrun bir sehim hisse-i şâyi‘asından keff-i yed ve benimle hâzıra-i mezbûreye teslîme zevce-i mezbûre Fâtıma Kadın’a tenbîh olunmak murâdımızdır deyü hâzıra-i mezbûre Âmine Hatun ile ma‘an bi’l-verâse da‘vâ eylediklerinde zevce-i mezbûre dahi cevâbında menzil-i mezkûrun ber-i‘tibâr-ı merkūm üç sehim hisse-i şâyi‘asına el-yevm vaz‘-ı yedini ikrâr u i‘tirâf edip lâkin menzil-i mezkûr zevcim müteveffâ-yı mezbûrun hayâtında müstakillen yedinde mülkü iken yedimde olup İstanbul’da Davudpaşa Mahkemesi’nden verilen işbu bir kıt‘a hüccet-i şer‘iyye nâtıka olduğu üzere zevcim müteveffâ-yı mezbûr Mehmed Efendi hayâtında menzil-i merkūmun dört sehim i‘tibârıyla iki sehim hisse-i şâyi‘asını yedinde ibkā edip mâ‘adâ iki sehim hisse-i şâyi‘asını tarafeynden îcâb ve kabûlü hâvî şurût-ı müfsidede ve muvâza‘adan ârî bey‘-i bâtt-ı sahîh-i şer‘î ile bin guruş semen-i medfû‘ ve makbûza bana bey‘ ve temlîk ve teslîm eylediğinde ben dahi ber-vech-i muharrer iştirâ ve temellük ve tesellüm ve kabûl etmemle ol vechile menzil-i mezkûrun dört sehim i‘tibârıyla iki sehmi zevcem müteveffâ-yı mezbûrun iki sehmi dahi şirâen benim yedimizde mülkümüz iken zevcim mezbûr Mehmed Efendi fevt oldukda yedinde ibkā eylediği mezkûr iki sehim hisse-i şâyi‘anın dört sehim i‘tibârıyla bir sehmi bana ve üç sehmi dahi müdde‘iyân-ı mezbûrân Mehmed Ağa ve Emine Hatun’a mevrûs olmağla ol vechile ben menzil-i mezkûrun üç sehim hisse-i şâyi‘asını ırsen ve şirâen zabt ve vaz‘-ı yed ederim deyü mazmûnu takrîr-i meşrûhuna muvâfık hüccet-i mezkûreyi ibrâz eylediği def‘ini ve mazmûn-ı hüccet-i mezkûreyi müdde‘iyân-ı mezbûrân Mehmed Ağa ve Emine Hatun bi-tamâmihâ tâyi‘an ve kat‘iyyen ikrâr ve tasdîk etmeleriyle mûcebiyle müdde‘iyân-ı mezbûrân da‘vâ-i mezkûreleriyle mezbûre Fâtıma Kadın’a bî-vech-i şer‘î mu‘ârazadan men‘ olundukları huzûr-ı [âlîlerine i‘lâm olundu]. Fî 15 Ş sene [1]273. el-Hâc İbrahim.