Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 74 Hüküm no: 51 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arpacı esnafından Divriğli Ali’nin, Divriğli İsmail aleyhindeki alacak iddiasından men olunması Mübâşirine teslîm. Ma‘rûz, İstanbul hısnı ebvâbından Kapan-ı dakīk kapısı hâricinde vâki‘ Arpacı esnâfından Divriğli Ali b. İsmail mahfil-i şer‘iyyâtda bâ‘isü’l-i‘lâm Divriğli İsmail b. Murtaza muvâcehesinde ben işbu târîh-i i‘lâmdan iki gün mukaddem mârrü’z-zikr Kapan-ı dakīk kapısı hâricinde vâki‘ mağazam derûnunda mevcûde malım olan şa‘îrden ma‘lûmü’l-keyl şa‘îri âhara bey‘ etmek üzere vezn ve dört aded çuval derûnuna vaz‘ eder iken merkūm İsmail dahi çuval ağzı açmak üzere mu‘âvenet eder olduğu hâlde malım olup koyun cebimde olan üç guruş kıymetli bir mâvi kese ile derûnunda mevzû‘ beher adedi yirmi dörder guruşdan cem‘an iki yüz seksen sekiz guruşa mu‘âdil on iki aded beyaz Mecidiye ve bir adedi yirmi beş guruşdan cem‘an kırk guruşa mu‘âdil iki aded Rusya karbonu ve yetmiş iki guruşa mu‘âdil yüz kırk dört aded yirmi paralık beyaz akçem ol esnâda yere düşdükde mezbûr İsmail zikr olunan keseyi ol mikdâr akçe ile ma‘an fuzûlî ve bi-gayrı hakkın derhâl hufyeten ahz ü kabz etmekle mevcûde ise a‘yânını ve müstehleke ise ba‘de’s-sübût mezkûr kesenin kıymeti olan meblağ-ı merkūm üç guruş ile zikr olunan Mecidiye ve Karbon ve Beyaz akçenin emsâlini merkūm İsmail’den bi-tarîkı’d-damân taleb ederim deyü ba‘de’d-da‘vâ ve’l-istintâk, ol dahi cevâbında inkâr etmekle müdde‘î-i merkūm Ali ber-minvâl-i muharrer müdde‘âsını isbâtdan izhâr-ı acz edip istihlâf etdikde talebiyle merkūm İsmail bi’l-muvâcehe ber-nehc-i şer‘î tahlîf olunmağın mûcebince müdde‘î-i merkūm Ali da‘vâ-i mezkûresiyle mezbûr İsmail’e bilâ-beyyine mu‘ârazadan men‘ olunduğu mübâşirleri bâb-ı zabtiye neferâtından Arabgirli Mehmed Ağa kulları yediyle huzûr-ı [âlîlerine i‘lâm olundu]. Fî 8 L sene [12]73. Raşid.