Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 75 Hüküm no: 52 Orijinal metin no: [10a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agob, Mardıros ve Artin’in vefat eden annelerinden intikal eden mirastan kalan hisselerini babaları Mıgırdıç’tan tahsil etmeleri Kılavuz-ı sânî Mustafa kaydıyla Cibâlili Hacı Edhem Çavuş’a teslîm. Mahrûse-i Galata’ya muzâfe Beyoğlu’nda vâki‘ Boyacı sûkunda sâkine iken bundan akdem vefât eden teba‘a-i Devlet-i aliyye’den ve Ermeni milleti nisvânından Kosta bt. Hanparsum v. Adam’ın verâseti zevc-i metrûku teba‘a-i merkūmeden Mıgırdıç v. Kirhor ile sadrî kebîr oğulları Agob ve Mardıros ve Artin’e münhasıra olduğu lede’ş-şer‘i’l-enver zâhir ve mütehakkık oldukdan sonra vârisûn-ı merkūmûndan merkūmân Agob ve Mardıros’dan her biri merkūm Artin tarafından husûs-ı âti’l-beyanda taleb ve da‘vâ ve ahz ü kabza ve lede’l-iktizâ sulh ve ibrâya vekâlet-i âmme-i mutlakā-i sahîha-i şer‘iyye ile vekîl olduğu millet-i merkūmeden Dellâl Kigork v. Kokas [10b] ve Kirhor v. Avadis şehâdetleriyle bi’l-muvâcehe ber-nehc-i şer‘î sâbit ve sübût-ı vekâletine hükm-i şer‘î lâhık olan yine teba‘a-i merkūmeden Attâr Kirhor v. Zeron hâzır olduğu hâlde Bâbıâlî’ye takdîm eyledikleri arzuhâlleri bâlâsına sâdır olan fermân-ı âlîlerine imtisâlen mahfil-i şer‘iyyâtda zevc-i merkūm Mıgırdıç muvâcehesinde vâlidemiz ve mûrisemiz müteveffât-ı merkūmenin hîn-i vefâtında mahâlle-i merkūmede vâki‘ mütemekkine olduğu menzilinde mevcûde terekesi olan mecmû‘u bin beş yüz guruş kıymetli bir aded nâfe kürk <> ve beş aded elvan basma anteri ma‘a şalvar ve üç aded gömlek ve bir aded şalâkî ferâce ve iki aded yün memlû çit döşek ve iki aded penbe memlû şilte ve iki aded yün memlû baş yasdığı ve iki aded basma yorgan ma‘a çarşeb ve iki aded penbe memlû yüz yasdığı ve bir aded yazma yemenîyi babamız merkūm Mıgırdıç fuzûlî ve bi-gayrı hakkın müstakillen ahz ü kabz ve ketm ü ihfâ etmekle suâl olunup eşyâ-yı muharrere-i mezkûre mevcûde ise a‘yânından ve müstehleke ise ba‘de’s-sübût kıymetleri olan meblağ-ı mecmû‘-ı mezkûr bin beş yüz guruşdan bizimle müvekkil-i merkūm Artin’in hisse-i ırsiye-i şer‘iyyemizi babamız merkūm Mıgırdıç’dan hâlâ taleb ederiz deyü hâzır-ı vekîl-i merkūm Kirhor ile ma‘an bi’l-asâle ve bi’l-vekâle tasaddî eylediğimiz da‘vâmızdan bâ-tavassut-ı muslihîn merkūm Mıgırdıç ile an-inkâr kat‘â li’n-nizâ‘ altı yüz elli guruş üzerine sulh olduğumuzda ol dahi sulh-ı mezkûru ba‘de’l-kabûl bedel-i sulh-ı mezkûrdan mâ‘adâ ziyâde müdde‘âmıza bi’l-cümle hukūk-ı mîrâsa müte‘allıka da‘vâdan biz bi’l-asâle ve hâzır-ı vekîl-i merkūm Kirhor dahi müvekkile-i merkūme izâfetle bi’l-vekâle merkūm Mıgırdıç’ın zimmetini ibrâ-i sahîh-i şer‘î ile ibrâ ve iskāt eylediğimizde ol dahi kezâlik hukūk-ı mîrâsa müte‘allıka da‘vâdan bizimle müvekkil-i merkūm Artin’in zimmetini ibrâ-i sahîh-i şer‘î ile ibrâ ve iskāt ve tarafeynden her birimiz ber-vech-i muharrer âharın ibrâsını kabûl eyledik deyü ba‘de’l-ikrâr ve’t-tasdîk bedel-i sulh-ı mezkûr altı yüz elli guruşu müdde‘iyân-ı merkūmân Agob ve Mardıros ile hâzır-ı vekîl-i merkūm Kirhor’a edâ ve teslîme merkūm Mıgırdıç’a tenbîh olunduğu mübâşirleri Dîvân-ı de‘âvî çavuşlarından kılavuz-ı sânî Mustafa Ağa yediyle huzûr-ı [âlîlerine i‘lâm olundu]. Fî 14 Ş sene [1]273. İzzet.