Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 76 Hüküm no: 53 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Salih Efendi’nin saraç dükkânı gediğini Mehmed Şakir Ağa’ya satması Kâtibi Efendi’ye teslîm. Mahrûse-i Galata’da Yolcuzâde mahâllesinde sâkin Mehmed Salih Efendi b. el-Hâc Ali nâm kimesne mahfil-i şer‘iyyâtda sarraç esnâfından bâ‘isü’l-i‘lâm es-Seyyid Mehmed Şakir Ağa b. Hüseyin Hüsnü nâm kimesne muvâcehesinde İstanbul’da Saraçhânebaşı nâm mahâlde vâki‘ bir tarafdan berber Abdullah Ağa dükkânı ve bir tarafdan Sarrâc Osman Ağa dükkânı ve bir tarafdan Saraçhâne duvarı ve taraf-ı râbi‘i tarîk-i âm ile mahdûd bir bâb sarraç dükkânı derûnunda mevcûde beyne’l-esnâf Sarrâc gediği ta‘bîr olunur bâ-defter-i müfredât âlât-ı lâzıme-i ma‘lûmeden her biri yedimde olan işbu bir kıt‘a i‘lâm-ı şer‘î mantûkunca akd-i âti’z-zikrin sudûruna değin müstakillen yedimde malım ve mülküm olmağla el-hâletü hâzihi ben ber-minvâl-i muharrer mâlik olduğum dükkân ve âlât-ı gedik-i mezkûrları tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr es-Seyyid Mehmed Şakir Ağa’ya on bin guruşa bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezkûr on bin guruşu bana tamâmen def‘ ü teslîm eylediğinde ben dahi yedinden tamâmen ve kâmilen ahz ü kabz etmemle mebî‘-i mezkûrların tağrîr ve gabnine müte‘allıka da‘vâdan tarafeynden her birimiz âharın zimmetini ibrâ-i sahîh-i şer‘î ile kabûlümüzü hâvî ibrâ ve iskāt eyledik. Ba‘de’l-yevm dükkân-ı mahdûd-ı mezkûr ile âlât-ı gedik-i merkūm müşterî-i mezbûr es-Seyyid Mehmed Şakir Ağa’nın mülk-i müşterâsı ve hakk-ı sırfı olup benim aslâ ve kat‘â alâka ve medhalim kalmamışdır deyü mukırr-ı merkūm Mehmed Salih Efendi’nin sâdır olan bi’l-cümle takrîr-i meşrûhunu mezbûr es-Seyyid Mehmed Şakir Ağa tasdîk ve tahkīk etdikden sonra gedikler hakkında bâ-irâde-i seniyye karârgîr olan nizâm-ı müstahseneye tevfîkan âlât-ı gedik-i mezkûru dahi Evkāf-ı hümâyûn-ı hazret-i mülûkâneye terk ve teberru‘ ederek icâre-i müeccele takdîriyle Nezâret-i celîle-i Evkāf-ı hümâyûndan emsâli misillü bir kıt‘a temessük istihsâli lâzım geldiği müşterî-yi mezbûr es-Seyyid Mehmed Şakir Ağa’ya kıbel-i şer‘den tefhîm olunduğu huzûr-ı [âlîlerine i‘lâm olundu]. Fî 2 Ş sene [1]273. Ser-kâtibe.