Bab Mahkemesi 54 Numaralı Sicil (H. 1102 / M. 1691) cilt: 20, sayfa: 110 Hüküm no: 88 Orijinal metin no: [14a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Mustafa’nın Mehmed Bey b. Bayram’a borcunu ödediği Mahmiye-i İstanbul’da Sarıgez’de sâkin Mehmed Bey b. Bayram tarafından husûs-ı âti’l-beyâna vekîl olup, Hasan Çelebi b. Mehmed ve Ahmed Ağa b. Receb şehâdetleri ile şer‘an vekâleti sâbite olan Abdülbâki Ağa b. Mustafa meclis-i şer‘-i şerîf-i enverde, vilâyet-i Anadolu’da medîne-i Tire’de Türenc? mahallesinde sâkin işbu bâ‘isü’l-kitâb Hüseyin b. Mustafa mahzarında bi’l-vekâle ikrâr ve i‘tirâf edip, müvekkilim mezbûr Mehmed Bey mukaddemâ Tire mütesellimi olmağla merkūm Hüseyin müvekkil-i mezbûr için bi gayri hakkın cebren yüz aded Engürüs altını ve kıymetleri beynimizde ilm-i şer‘î ile ma‘lûm bir câmeşûy ve sâir eşyâ-yı ma‘lûmeyi kabz etmiş idi deyu müvekkilim mezbûrdan da‘vâ edip, ol vechile beynlerinde ba‘de’l-münâza‘a muslihûn tavassut edip, beynlerinde evvelâ sekiz bin akçelik mangır üzerine musâlaha olundukda, mezbûr Hüseyin dahi sulh-ı mezbûru kabûl ve bedelini kabz ve ziyâde[ye] müte‘allika âmme-i da‘vâdan ibrâ etmekle, müvekkil-i mezbûr Mehmed Bey dahi mezkûr Hüseyin[‘in] bedel-i sulh olmak üzre verdiği meblağı mezbûre müte‘allika cemî‘ da‘vâdan ibrâ eyledi, her birinin âhar ile nizâ‘ları kalmadı dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Ahmed Çavuş b. Receb, el-Hâc İbrahim Ağa b. Yusuf, Hasan Çavuş b. Mustafa, Ahmed Efendi el-imâm, Hüseyin Çavuş b. Mehmed ve gayruhüm.