Bab Mahkemesi 54 Numaralı Sicil (H. 1102 / M. 1691) cilt: 20, sayfa: 111 Hüküm no: 89 Orijinal metin no: [14a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Zülfikar’ın Sakine bt. Hüseyin’den intikal eden eşyaları Mehmed Çelebi b. İsmail’e satması Fi’l-asl vilâyet-i Anadolu’da Akyazı kazâsına tâbi‘ Bâzergânlı nâm karye sükkânından olup, hâlâ mahmiye-i İstanbul’da Çıkrıkçı Kemal mahallesinde tavattun eden Mustafa b. Zülfikar meclis-i şer‘-i şerîf-i enverde Mehmed Çelebi b. İsmail nâm kimesne mahzarında ikrâr-ı tâm ve takrîr-i kelâm edip, karye-i mezbûrede sâkine iken bundan [akdem] vefât eden li ebeveyn er karındaşım kızı Sâkine bt. Hüseyin nâm hâtun[dan] bi hasebi’l-irsi’ş-şer‘î bana intikāl eden işbu yedimde olan defter nâtıka olduğu üzre, bir sîm bâzûbend ve bir sîm saçbağı ve bir istefan ve üç gömlek ve bir beyaz sâde ve bir mâî dârâyî kaftan ve bir mâî kapama ve bir don ve bir mikdâr bez ve iki ayaklı taş ve bir küçük yasdık ve bir dest-mâl ve bir balta ve def‘a bir balta ve kazan ve bir testere ve mendil ve iki saçbağı ve bir küçük musluk ve kebîr bakraç ve kazgan ve bir süd tavası ve bir saban demiri ve bir kılıç demiri ve bir çatal sabanı demiri ve bir ibrik ve iki çuval ve bir anbar ve iki saç ve bir düğe ve bir el değirmeni ve bir ma‘lûmü’l-hudûd menzil yeri ve iki tosun ve iki saman damı ma‘a saman ve bir çift kara sığır öküzü ve bir tencere ve bir yorgan ve bir yasdık ve bir kilim ve bir çuka ferâce ve iki gömlek ve iki tombay tosunu ve bir kara sığır ineği ve bir kilim ve bir tâbe ve bir bakraç ve bir sahan ve bir zıbınımı [bi]safkatin vâhidetin mezbûr Mehmed Çelebi’ye yedi [bin] akçe [ye bey‘], ol dahi ber vech-i muharrer iştirâ ve temellük ve kabûl ettiğinden sonra semeni olan meblağ-ı mezbûrun üç bin akçesini mezbûr Mehmed Çelebi yedinden ahz u kabz edip, bâkī dört bin akçesini def‘aten iktidârı olmamağla te’cîle tâlib oldukda, ben dahi târih-i kitâbdan kırk bir gün tamâmına değin te’cîl eylediğimde, ol dahi te’cîl-i mezbûru ber vech-i muharrer kabûl eylediğinden sonra eşyâ-yı muharrere-i mezbûrede kat‘â benim alâka ve medhalim kalmayıp, mezbûr Mehmed Çelebi’yi mahallinde kabz ve tasarrufa taslît eyledim dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi min şehri Cemâziyelevvel li sene isneteyn ve mi’e ve elf. Şuhûdü’l-hâl: Lütfullah b. Ahmed, Osman b. Abdullah, Ömer b. Ali, Ömer b. Mehmed, Ahmed b. Ahmed.