Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 80 Hüküm no: 59 Orijinal metin no: [11b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Ali’nin, Fatımatüzzehra Hatun aleyhindeki alacak iddiası ile darb iddiasını ispat edememesi Mübâşirine teslîm. Ma‘rûz, İstanbul’da Küçükayasofya mahâllesinde sâkine mu‘arrefetü’z-zât Emine bt. Ali nâm hatun mahfil-i şer‘iyyâtda İstanbul’da Kadırga limanı civârında Şehsuvar mahâllesi sâkinelerinden bâ‘isetü’l-i‘lâm mu‘arrefetü’z-zât Fâtımatüzzehra Hatun bt. Hasan muvâcehesinde kezalik zâtı mu‘arrefe Zenciye Fâtıma nâm-ı diğer Servinaz Kadın bt. Abdullah hâzıra olduğu hâlde mezbûre Fâtımatüzzehra Hatun’un kāyınvâlidesi gāibetü ani’l-meclis Hadîce Hatun’un malı olup bi-tarîkı’l-emâne yedimde mevcûde olan bir aded nühâs mangalı mezbûre Fâtımatüzzehra Hatun gāibe-i merkūme tarafından bilâ-tevkîl mahâlle-i merkūmede vâki‘ sâkin olduğum menzilime gelip benden mutâlebe ve ben dahi teslîmden imtinâ‘ edip beynimizde münâza‘a ve münâkaşa vukū‘una binâen mezbûre Fâtımatüzzehra Hatun beni bi-gayrı hakkın yumruk ile arkama darb eylediğinden mâ‘adâ malım olup menzil-i mezkûrda çekmece derûnunda mevcûd olan yeşil bükmede dizili beheri otuzar guruşa mu‘âdil olmak üzere yirmi sekiz aded Hayriye altınımı dahi fuzûlî ve bi-gayrı hakkın ahz ü kabz etmekle mevcûde ise aynlarını ve müstehleke ise ba‘de’s-sübût misillerini ve darb-ı mezkûrun mûceb-i şer‘îsini merkūme Fâtımatüzzehra Hatun’dan bi-tarîkı’d-damân hâlâ taleb ederim deyü ba‘de’d-da‘vâ ve’l-istintâk, ol dahi cevâbında inkâr etmekle müdde‘iye-i mezbûre Emine Hatun ber-minvâl-i muharrer müdde‘âlarımı isbâtdan izhâr-ı acz birle istihlâf etdikde mezbûre Fâtımatüzzehra Hatun bi’l-muvâcehe ber-nehc-i şer‘î tahlîf olunmağın mûcebince müdde‘iye-i mezbûre Emine Hatun da‘vâ-i mezkûreleriyle mezbûre Fâtımatüzzehra Hatun’a bilâ-beyyine mu‘ârazadan men‘ olunduğu mübâşirleri Bâb-ı Zabtiye’den Çorumlu İbrahim Ağa yediyle bi’l-iltimâs huzûr-ı [âlîlerine i‘lâm olundu]. Fî 14 L sene [12]73. Edhem.