Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 81 Hüküm no: 60 Orijinal metin no: [11b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nedo bt. Marko’nun varislerinin Kireçci ustası Panayot aleyhindeki alacak iddiasında anlaşma sağlanması Nüsha-i sâniye, Yaylalı Mustafa Çavuş’a teslîm. Ma‘rûz, Fi’l-asl Rumeli’de Ohri sancağına muzâfe Debre-i bâlâ kazâsına tâbi‘ Kıriştine-i zîr karyesi ahâlîsinden olup mahrûse-i Galata’ya muzâfe İstinye nâhiyesinde nefs-i İstinye karyesinde vâki‘ Kireçhâne’de sâkin iken bundan akdem fevt olan Çalıcı Simo v. Tariko v. Tarayo’nun verâseti karye-i mezbûrede sâkineler zevce-i metrûkesi Nedo bt. Marko v. Angeli ile anası Yuvano bt. Tarimo v. Tarayo ve sulbiye kebîre kızları Petrova ve Serminova ve İstefanova ve li-ebeveyn er karındaşı Delo’ya münhasıra olduğu lede’ş-şer‘i’l-enver zâhir ve mütehakkık oldukdan sonra vârisûn-ı merkūmûn Nedo ve Yuvano <> ve Petrova ve Sereminova ve Destova ve İstefanova ve Delo taraflarından husûs-ı âti’l-beyanda taleb ve da‘vâ ve ahz ü kabza ve lede’l-iktizâ sulh ve ibrâya vekâlet-i âmme-i mutlakā-i sahîha-i şer‘iyye ile bâ-hüccet-i şer‘iyye vekîlleri olduğum zevce ve ümm-i mersûmetân ile benât-ı merkūmâtın şahısları bi’l-ma‘rifeti’ş-şer‘iyye ârifân Debreli Arif Ağa b. Numan ve Şaban Ağa b. Süleyman nâm kimesneler şehâdetleriyle ber-nehc-i şer‘î sâbit ve sübût-ı vekâletine hükm-i şer‘î lâhık olan kazâ-i merkūm kurâlarından Kıriştine-i bâlâ [12a] karyesi ahâlîsinden arzuhâl eden Miho v. Apostol mahfil-i şer‘iyyâtda derûn-ı arzuhâlde mastûrü’l-ism Kireçci Usta Panayot v. Tanaş muvâcehesinde müvekkillerim mersûmûnun mûrisleri müteveffâ-yı mersûm Simyon’un mârrü’z-zikr İstinye karyesinde vâki‘ Kireçhâne’de hîn-i fevtinde sandığında nakd-i mevcûdu olan bin dört yüz altmış guruş ile malı olan beheri bin beş yüz guruşdan cem‘an üç bin guruş kıymetli iki re’s kır bargirini merkūm Panayot fuzûlî ve bi-gayrı hakkın ahz ü kabz etmekle mârrü’z-zikr bargirler yedinde mevcûd ise aynen ve müstehleke ise ba‘de’s-sübût kıymetleri olan meblağ-ı mecmû‘-ı mezkûr üç bin guruş ve nakd-i meblağ-ı merkūm bin dört yüz altmış guruş ki min-haysü’l-mecmû‘ dört bin dört yüz altmış guruşu müvekkillerim merkūmûn için bi’l-vekâle hâlâ ve damânen taleb ederim deyü tasaddî eylediğim da‘vâmdan bâ-tavassut-ı muslihîn müvekkillerim merkūmûn Nedo ve Yuvano ve Petrova ve Serminova ve Destova ve İstefanova ve Delo’ya izâfetle bi’l-vekâle mersûm Panayot ile bi’t-tav‘ ve’r-rızâ bin beş yüz guruş üzerine sulh olduğumda ol dahi sulh-ı merkūmu kabûl ve bedel-i sulh-ı merkūm bin beş yüz guruşu işbu meclis-i şer‘de müvekkillerim merkūmûn için bana def‘ ü teslîm eylediğinden ben dahi yedinden bi’l-vekâle tamâmen ve kâmilen ahz ü kabz etmemle ziyâde müdde‘âma ve bi’l-cümle husûs-ı mezkûra ve müteveffâ-yı merkūmun kâffe-i terekesine ve hukūk-ı mîrâsa müte‘allıka âmme-i de‘âvîden ben müvekkillerim merkūmûna izâfetle bi’l-vekâle merkūm Panayot’un zimmetini, ol dahi kezâlik husûs-ı merkūma müte‘allıka da‘vâdan müvekkillerim merkūmûnun zimmetlerini tarafeynden her birimiz ibrâ-i sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını asâleten ve vekâleten kabûl edip bu vechile kat‘-ı münâza‘a ve ref‘-i husûmet eyledik deyü ikrâr ve tasdîkleri tescîl ve huzûr-ı [âlîlerine i‘lâm olundu]. Fî 17 L sene [12]73. Edhem.