Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 82 Hüküm no: 61 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Zafiri’nin Bakkal Panayot ve Attar Dimitri aleyhindeki alacak davasından vazgeçmesi Tophanevî Mustafa Kavvâs’a teslîm. Ma‘rûz, Vilâyet-i Anadolu’da Mudanya kasabası ahâlîsinden iken işbu târîh-i i‘lâmdan bir buçuk sene mukaddem fevt olan teba‘a-i Devlet-i aliyye’den ve Rum milletinden Şerbetçi Yanko v. Aci Dimitri v. Aci Yamandi’nin verâseti zevcesi İsmice bt. Yorgi ile sulbî sagīr oğlu diğer Yanko’ya münhasıra ba‘dehû sagīr-i merkūm diğer Yanko dahi fevt olup verâseti anası zevce-i merkūme İsmice ile min-kıbeli’l-eb ceddinin li-ebeveyn ammi oğlu Nikola v. Zafiri’ye münhasıra olduğu lede’ş-şer‘i’l-enver zâhir ve mütehakkık oldukdan sonra sâhib-i arzuhâl merkūm Nikola mahfil-i şer‘iyyâtda derûn-ı arzuhâlde mezkûrü’l-ism yine kasaba-i mezkûre ahâlîsinden ve Rum milletinden merkūm Bakkāl Panayot v. Togodoş ve Attâr Dimitri v. Apostol muvâcehelerinde mûrisimiz müteveffâ-yı evvel-i merkūm Yanko’nun hîn-i fevtinde bâ-defter-i müfredât ma‘lûmü’l-esâmi kesân zimmetlerinde cihet-i karzdan alacak hakkı olan kırk bin guruşu gerek merkūmûndan kable’l-ahz ve’l-istîfâ fevt olup meblağ-ı merkūm kırk bin guruş benimle zevce-i merkūmeye mevrûs oldukdan sonra işbu merkūmân Panayot ve Dimitri meblağ-ı merkūmu kesân-ı merkūmûndan emir ve tevkîlimiz bi’l-ma‘iyye ahz ü kabz ve hisse-i ırsiyemi bana vermeyip fuzûlî ve bi-gayrı hakkın kendi umûrlarına sarfla istihlâk edip el-hâletü hâzihi ben mücîz ve râzı olmamamla meblağ-ı merkūm kırk bin guruşdan hisse-i şer‘iyyemi merkūmân Panayot ve Dimitri’den bi-tarîkı’d-damân hâlâ taleb ederim deyü tasaddî eylediğim da‘vâmdan rızâmla meccânen fâriğ olduğumda onlar dahi benim fakīr hâlime merhameten bana mallarından teberru‘an ve seviyyen yüz guruş def‘ ü teslîm ve umûruma sarfla istihlâke emr eylediklerinde ben dahi yedlerinden ahz ü kabz ve emirleriyle umûruma sarfla istihlâk etmemle mutâlebesine ve bi’l-cümle husûs-ı mîrâsa müte‘allıka da‘vâdan merkūmân Panayot ve Dimitri’nin zimmetlerini ibrâ-i sahîh-i şer‘î ile kabûllerini hâvî ibrâ ve iskāt eylediğimde onlar dahi bana mallarından medfû‘ları olan meblağ-ı müstehlek-i merkūmun istirdâdına müte‘allıka da‘vâdan benim zimmetimi ibrâ-i sahîh-i şer‘î ile kabûlümü ibrâ ve iskāt edip bu vechile kat‘-ı münâza‘a eyledik deyü mukırr-ı müdde‘î-i merkūm Nikola’nın bi’l-cümle takrîr-i meşrûhunu merkūmân Panayot ve Dimitri’den her biri tasdîk ve tahkīk eyledikleri tescîl ve huzûr-ı [âlîlerine i‘lâm olundu]. Fî 19 L sene [12]73. el-Hâc İbrahim