Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 83 Hüküm no: 62 Orijinal metin no: [12a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Behiye Hatun’un Rusçuklu Ahmed Ağa’dan muhalaa usulüyle boşanması Zabtiye’den Ruscuklu Ahmed nefere teslîm. Ma‘rûz, Bâ‘isetü’l-i‘lâm mu‘arrefetü’z-zât Fâtıma Behiye Hatun bt. Ömer mahfil-i şer‘iyyâtda zevc-i muhâlı‘ı Bâb-ı Zabtiye neferâtından Ruscuklu Ahmed Ağa b. Abdullah muvâcehesinde mezbûr Ahmed Ağa iki yüz elli bir guruş mehr-i müeccel tesmiyesiyle zevc-i dâhilim olup lâkin beynimizde hüsn-i mu‘âşeretimiz olmamağla zimmetinde mütekarrir ve ma‘kūdün-aleyh mehr-i müeccel-i mezkûr hakkım olan iki yüz elli bir guruşun iki yüz kırk guruşunu hâlâ bana edâ ve teslîm etmek ve bâkīsi olan on bir guruş ile nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Ahmed Ağa ile muhâla‘a-i sahîha-i şer‘iyye ile hul‘ olduğumda ol dahi hul‘-ı mezkûru ba‘de’l-kabûl meblağ-ı merkūm iki yüz kırk guruşdan mâ‘adâ hukūk-ı zevciyete ve ibtidâ-yı zevciyetimizden işbu târîh-i i‘lâma gelince sâir cemî‘ hukūk-ı [12b] şer‘iyyeye müte‘allıka âmme-i da‘vâdan ben mezbûr Ahmed Ağa’nın zimmetini ibrâ-i âmm-ı sahîh-i şer‘î ibrâ ve iskāt eylediğimde ol dahi kezâlik hukūk-ı zevciyete ve ibtidâ-yı zevciyetimizden işbu târîhe gelince sâir cemî‘ hukūk-ı şer‘iyyeye müte‘allıka âmme-i da‘vâdan benim zimmetimi ibrâ ve iskāt ve her birimiz ber-vech-i muharrer âharın ibrâsını kabûl eyledik deyü ba‘de’l-ikrâr ve’t-tasdîk ibrâdan müstesnâ meblağ-ı merkūm iki yüz kırk guruşu mezbûre Fâtıma Behiye Hatun’a çend rûz zarfında edâ ve teslîme mezbûr Ahmed Ağa ta‘ahhüd eylediği tescîl ve huzûr-ı [âlîlerine i‘lâm olundu]. Fî 13 L sene [12]73. Hasan.