Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 84 Hüküm no: 63 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mavnacı Mustafa Ağa ile kız kardeşi Hanife Hanım’ın, vefat eden anne ve babasından intikal eden ve Osman Kaptan’da olan alacaklarını tahsil etmeleri Mübâşiri Galatalı Hacı Mehmed Kavvâs’a teslîm. Ma‘rûz, Vilâyet-i Anadolu’da Kinolu kazâsı kurâsından Örüne karyesi ahâlîsinden olup işbu târîh-i i‘lâmdan dokuz sene mukaddem vefât eden tüccârdan Kavukluoğlu Ali Ağa b. Osman b. Abdullah’ın verâseti zevce-i menkûha-i metrûkesi Fâtıma Hatun bt. Mehmed ile sulbî oğlu ol târîhde sagīr ve hâlâ kebîr Ma‘ûnacı Mustafa Ağa ve sulbiye kızı ol târîhde sagīre ve hâlâ kebîre Hanife Hatun’a münhasıra ba‘dehû zevce-i mezbûre Fâtıma Hatun dahi vefât edip verâseti sadrî evlâdı mezbûrâna münhasıra olduğu lede’ş-şer‘i’l-enver zâhir ve mütehakkık oldukdan sonra sâhib-i arzuhâl kendi nefsinden asil ve li-ebeveyn kız karındaşı mezbûre Hanife Hatun tarafından husûs-ı âti’l-beyanda taleb ve da‘vâ ahz ü kabza ve lede’l-iktizâ sulh ve ibrâya vekâlet-i âmme-i mutlakā-i sahîha-i şer‘iyye ile vekîl olduğu zâtını bi’l-ma‘rifeti’ş-şer‘iyye ârifân karye-i mezbûre sâkinlerinden olup bu esnâda Dersa‘âdet’e gelen mellâh tâifesinden Mirasyedioğlu diğer Mustafa Ağa b. Mehmed ve Müezzinoğlu âhar Mustafa Ağa b. Ahmed nâm kimesneler şehâdetleriyle ber-nehc-i şer‘î sâbit ve sübût-ı vekâletine hükm-i şer‘î lâhık olan mezbûr Mustafa Ağa mahfil-i şer‘iyyâtda asil ve vekîl-i mezbûr Mustafa Ağa ile müvekkile-i mezbûre Hanife Hatun’un dâyinleri ve hâl-i suğrlarında tesviye-i emrlerine kıbel-i şer‘den vasiyy-i mansûbları tüccâr sefâini kapudanlarından İnceoğlu Osman Kapudan b. Mehmed muvâcehesinde babamız ve mûrisimiz müteveffâ-yı mezbûr Ali Ağa’nın hîn-i vefâtında mezbûr Osman Kapudan vasiyy-i mansûbumuz olmak cihetiyle bâ-defter-i müfredât tereke-i mebî‘a-i ma‘lûmesi esmânından ve nukūd-ı mevcûdesinden benimle kız karındaşım ve müvekkilem mezbûrenin hisse-i ırsiyemize isâbet eden cem‘an on yedi bin yedi yüz seksen guruşu bi’l-vesâye ve vâlidemiz müteveffât-ı sâniye-i mezbûre Fâtıma Hatun’un hisse-i ırsiyesine isâbet eden iki bin beş yüz kırk guruşu dahi vâlidemiz ve mûrisemiz müteveffât-ı sâniye-i mezbûrenin emir ve tevkîliyle bi’l-vekâle ahz u kabz ve vâlidemiz müteveffât-ı sâniye-i mezbûrenin hisse-i ırsiyesini kendüye vermeyip mecmû‘unu fuzûlî ve bi-gayrı hakkın kendi umûruna sarfla ba‘de’l-istihlâk vâlidemiz ve mûrisimiz müteveffât-ı sâniye-i mezbûre dahi hisse-i ırsiye-i mezkûresini kable’t-tazmîn fevt ve benimle kız karındaşım ve müvekkilem mezbûreye mevrûs olmağla el-hâletü hâzihi mebâliğ-i mezkûre cem‘an yirmi bin üç yüz yirmi guruşu mezbûr Osman Kapudan’dan bi’l-asâle ve bi’l-vekâle damânen taleb ederim deyü inkârına mukārin tasaddî eylediğim da‘vâmdan bâ-tavassut-ı muslihîn mezbûr Osman Kapudan ile bi’t-tav‘ ve’r-rızâ sekiz bin yedi yüz guruş üzerine sulh olduğumda ol dahi sulh-ı merkūmu kabûl ve bedel-i sulh-ı merkūmu bana def‘ ü teslîm eylediğinde ben dahi yedinden bi’l-asâle ve bi’l-vekâle tamâmen ve kâmilen ahz ü kabz etmemle ziyâde müdde‘âma ve bi’l-cümle hukūk-ı mîrâsa müte‘allıka âmme-i de‘âvîden ben bi’l-asâle ve müvekkilem kız karındaşım mezbûreye izâfetle bi’l-vekâle mezbûr Osman Kapudan’ın zimmetini ibrâ-i âmm-ı sahîh-i şer‘î ile ibrâ ve iskāt eylediğimde ol dahi kezâlik bi’l-cümle husûs-ı mezkûra müte‘allıka âmme-i de‘âvîden benimle kız karındaşım ve müvekkilem mezbûrenin zimmetini ibrâ-i âmm-ı sahîh-i şer‘î ile ibrâ ve iskāt ve her birimiz vech-i muharrer âharın ibrâsını asâleten ve vekâleten kabûl eyledik deyü mukırr-ı müdde‘î-i asıl ve vekîl-i mezbûr Mustafa Ağa’nın sâdır olan bi’l-cümle takrîr-i meşrûhunu mezbûr Osman Kapudan tasdîk ve tahkīk eylediği tescîl ve huzûr-ı [âlîlerine i‘lâm olundu]. Fî 15 L sene [12]73. Ser-ketebe.