Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 86 Hüküm no: 64 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ağa’nın Kurabiyeci esnafından Mehmed ve Ali aleyhlerindeki alacak iddiasından men olunması Ma‘rûz, Hasır süpürgeci esnâfından İstanbul’da Yüksekkaldırım civârında Molla Ali el-Fenârî mahâllesi ahâlîsinden Osman Ağa b. Süleyman nâm kimesne mahfil-i şer‘iyyâtda mahrûse-i Galata’ya muzâfe İstinye nâhiyesine muzâfe Yeniköy sâkinlerinden ve Kurabiyeci esnâfından bâ‘iseyi’l-i‘lâm Mehmed b. Mustafa ve Ali b. Ahmed nâm kimesneler muvâcehelerinde ben mezbûrân Mehmed ve Ali ile işbu târîh-i i‘lâm-ı şer‘înin yirmi dördüncü Çarşamba gecesi karye-i mezbûrede Tiryaki Abdullah Ağa’nın berber dükkânında beytûtet eylediğimde lâbis olduğum çuka saltamarkanın koyun cebinde bir yeşil kese derûnunda mevcûd malım olan iki aded yirmilik beyaz mecidiye ve yedi aded yirmişer guruşdan yüz kırk guruş ve yirmi aded onar guruşdan iki yüz guruş ki cem‘an üç yüz kırk guruşa mu‘âdil yirmi yedi aded kavâim-i nakdiye-i mütedâvileyi mezbûrân Mehmed ve Ali fuzûlî ve bi-gayrı hakkın bi’l-ma‘iyye hufyeten ahz ü kabz etmeleriyle suâl olunup zikr olunan iki aded mecidiye mevcûd ise a‘yânının müstehleke ise ba‘de’s-sübût emsâlleriyle meblağ-ı mecmû‘-ı merkūm üç yüz kırk guruşu mezbûrân Mehmed ve Ali’den bi-tarîkı’d-damân hâlâ taleb ederim deyü ba‘de’d-da‘vâ ve’l-istintâk onlar dahi cevâblarında müdde‘î-i merkūm Osman Ağa’nın ber-minvâl-i muharrer müdde‘âsını inkâr etmeleriyle müdde‘î-i merkūm Osman Ağa ber-vech-i muharrer müdde‘âsını isbâtdan izhâr-ı acz edip istihlâf etdikde mezbûr Mehmed ve Ali bi’l-muvâcehe ber-nehc-i şer‘î tahlîf olunmalarıyla mûcebince müdde‘î-i merkūm Osman Ağa da‘vâ-i mezkûresiyle mezbûrân Mehmed Ali’ye bilâ-beyyine mu‘ârazadan men‘ olunduğu tescîl ve mübâşirleri Bâb-ı Zabtiye neferâtlarından Çorumlu Mustafa Ağa kuları yediyle huzûr-ı [âlîlerine i‘lâm olundu]. Fî 25 L sene [12]73. İzzet.