Bab Mahkemesi 54 Numaralı Sicil (H. 1102 / M. 1691) cilt: 20, sayfa: 111 Hüküm no: 90 Orijinal metin no: [14a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Odabaşı b. Şaban’ın kölesi Ahmed b. Abdullah’ı azat etmiş olduğu Dergâh-ı âlî yeniçerilerinin otuz beşinci cemâ‘ati odabaşısı olup bundan akdem vefât eden Mehmed Odabaşı b. Şaban b. Mehmed’in abd-i memlûkü olup, ıtkını iddi‘â eden orta boylu açık kaşlı elâ gözlü Rûsiyyü’l-asl hâmilü hâze’l-kitâb Ahmed b. Abdullah meclis-i şer‘-i şerîf-i enverde, müteveffâ-yı mezbûrun vasiyy-i muhtârı olmağla, kendiye vaz‘-ı yed eden Ahmed Odabaşı b. Veli mahzarında üzerine da‘vâ ve takrîr-i kelâm edip, ben müteveffâ-yı mezbûr Mehmed Odabaşı’nın abd-i memlûkü olup, hâl-i hayâtında beni mâlından tahrîr ve i‘tâk edip, ben sâir ahrâr-ı asliyyîn gibi hür olmuş iken mezbûr Ahmed Odabaşı bana rık olmak zu‘miyle vaz‘-ı yed eder suâl olunup sebîlim tahliye ve her birine tenbîh olunmak matlûbumdur dedikde, gıbbe’s-suâl mezbûr Ahmed Odabaşı cevâbında, fi’l-hakīka mevsûf-ı mezbûra vaz‘-ı yedini ikrâr, lâkin müdde‘î-i mezbûrun mu‘tak olduğunu inkâr edicek, mevsûf-ı mezbûrdan müdde‘âsına beyyine taleb olundukda, udûl-i müslimînden olup Hâfız Paşa Câmi‘-i şerîfi kurbunda vâki‘ hânda sâkin İsmail Beşe b. Ali ve Yarhisâr mahallesinde sâkin İbrahim Beşe b. Ali ve Kapıcı Şaban Beşe b. Osman ve Ali Beşe b. Ahmed li ecli’ş-şehâde meclis-i şer‘a hâzırûn olup isre’l-istişhâd, fi’l-vâki‘ işbu müdde‘î-i mezbûr Ahmed’in mevlâsı müteveffâ-yı mezbûr Mehmed Odabaşı b. Şaban b. Mehmed hayâtında abd-i memlûkü işbu mevsûf-ı mezbûr Ahmed’i bizim huzûrumuzda mâlından tahrîr ve i‘tâk etmişidi. Biz bu husûsa bu vech üzre şâhidleriz, şehâdet dahi ederiz deyu her biri edâ-i şehâdet-i şer‘iyye eylediklerinde, gıbbe’t-ta‘dîl ve’t-tezkiye şehâdetleri makbûle olmağın, mûcebiyle mezbûr Ahmed’in ıtkına ba‘de’l-hükm, mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Mehmed Efendi b. Mustafa, İbrahim Beşe b. Ahmed, İbrahim Beşe b. Mehmed, Ali b. Bâli ve gayruhüm.