Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 86 Hüküm no: 65 Orijinal metin no: [12b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Paşa’nın, Dersa‘âdet Ordusunda nefer olan Ali aleyhindeki alacak davasından men olunması Mübâşiri Eyyûbî Mahmud Çavuş’a teslîm. Ma‘rûz, Anadolu Ordu-yı hümâyûnu Süvârî Mîrlivâsı sâhib-i arzuhâl izzetlü Mehmed Paşa b. Abdullah b. Abdurrahman tarafından husûs-ı âti’l-beyanda taleb ve da‘vâ ve ahz ü kabza ve lede’l-iktizâ sulh ve ibrâya vekîl olduğu Mahmud Ağa b. Ali ve teba‘adan Mehmed Ağa b. Süleyman nâm kimesneler şehâdetleriyle ber-nehc-i şer‘î sâbit ve sübût-ı vekâletine hükm-i şer‘î lâhık olan müvekkil-i paşa-i mûmâ-ileyhin yâver yüzbaşısı Mehmed Ağa b. Hasan mahfil-i şer‘iyyâtda Dersa‘âdet Ordu-yı hümâyûnu İkinci Alayının Üçüncü Bölüğünün Üçüncü Onbaşının sekizinci neferi derûn-ı arzuhâlde mezkûrü’l-ism Ali b. Abdullah muvâcehesinde yine Ordu-yı hümâyûn-ı mezkûr birinci Şeyhâne Taburunun İkinci Bölüğü’nde Mülâzım-i evvel Mustafa Efendi b. Osman hâzır olduğu hâlde mezbûr Ali mukaddemâ müvekkilim paşa-i mûmâ-ileyhin teba‘asından iken [13a] müvekilim paşa-i mûmâ-ileyh ile Kars muhârebesinde bulundukları esnâda savb-ı mezkûrda haymesi derûnunda mevzû‘ malı olan mecmû‘u dört bin iki yüz guruş kıymetli altın yaldızlı bir seyf ve bir pirinç palaska ve bir eğer ve bir başlık ma‘a takım ve bir sırmalı gāşiye ve bir İngilizkârî tabanca ve bir re’s esbini mezbûre li-ecli’l-isti‘mâl i‘âre ve teslîm, ol dahi istî‘âre ve tesellüm ve kabz ü kabûl etdikden sonra mezbûr Ali mârrü’z-zikr esb ile eşyâ-yı muharrere-i merkūmeyi müvekkilim Paşa-i mûmâ-ileyhe geri red ve teslîm etmeyip Rusya ordusu cânibine firâr etmekle zikr olunan esb ile eşyâ-yı muharrere-i merkūme mevcûde ise a‘yânını ve müstehleke ise ba‘de’s-sübût kıymetleri olan meblağ-ı mecmû‘-ı merkūm dört bin iki yüz guruşu müvekkilim paşa-i mûmâ-ileyh için mezbûr Ali’den bi-tarîkı’d-damân hâlâ taleb ederim deyü bi’l-vekâle da‘vâ etdikde ol dahi cevâbında mârrü’z-zikr esb ve eşyâ-yı muharrere-i mezkûre Paşa-i müşârün-ileyhin malı olarak yedimde mevcûd iken ben mârrü’z-zikr esbe süvâr olarak müvekkil-i paşa-i mûmâ-ileyhin emriyle kendi hayvânâtına ot biçmek için sâir refîklerim ile ma‘an Ordu-yı hümâyûn-ı mezkûrdan üç sâ‘at bu‘du olan mahâlle gitdiğimde Rusya askeri mahâll-i merkūma gelip üzerimize hücûm ve eşyâ-yı muharrere-i mezkûre ile esb-i merkūmu yedimden gasben ahz ü kabz ve ben def‘a kādir olmamamla ol vechile yed ve zimmetimde nesne kalmamışdır deyü ba‘de’d-def‘ ve’l-inkâr dâfi‘-i mezbûr Ali eylediği def‘-i meşrûhunda emîn olup yemîniyle tasdîk olunur ümenâdan olduğu müdde‘î-i vekîl-i mezbûra tefhîm, ol dahi bi’l-vekâle tâlib-i tahlîf olmayıp ve kavl-i mücerrediyle dahi şer‘an nesne sâbit olmamağın mûcebince müdde‘î-i vekîl-i mezbûr Mehmed Ağa müvekkili paşa-i mûmâ-ileyhe izâfetle bi’l-vekâle da‘vâ-i mezkûresiyle mezbûr Ali’ye bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu]. Fî 20 L sene [12]73. Edhem.