Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 87 Hüküm no: 66 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bolu’nun Gökçesu nahiyesine bağlı Büyükkuzu köyü ahalisinden Ali Ağa’nın Aşçı Körağaoğlu İsmail aleyhindeki tarla davasının kabul olunmaması Mübâşiri Carhacı Ahmed Kavvâs’a teslîm. Ma‘rûz, Vilâyet-i Anadolu’da Bolu sancağında vâki‘ Gökçesu nâhiyesine tâbi‘ Büyükkuzu karyesi ahâlîsinden derûn-ı arzuhâlde mezkûrü’l-ism Ali Ağa b. Hasan nâm kimesne mahfil-i şer‘iyyâtda yine karye-i merkūme ahâlîsinden sâhib-i arzuhâl Aşçı Körağaoğlu İsmail Ağa b. Halil nâm kimesne muvâcehesinde karye-i merkūmede kâin bir tarafdan Seferoğlu ve bir tarafdan Kalaycı tarlaları ve tarafeyni tarîk-i âm ile mahdûd dört dönüm mikdârı bir kıt‘a ve yine karye-i merkūmede Eğrencek nâm mahâlde vâki‘ bir tarafdan Kumcuoğlu tarlası ve bir tarafdan benim tarafımda[tasarrufumda] bulunan tarla ve tarafeyni tarîk-i âm ile mahdûd altı dönüm mikdârı bir kıt‘a ve yine karye-i mezbûre hudûdu dâhilinde kâin bir tarafdan Seferoğlu Mustafa tarlası ve bir tarafdan Kumcuoğlu tarlası ve bir tarafdan zikri mürûr eden Eğrencek nâm mahâlde vâki‘ altı dönüm tarla-yı mahdûd-ı mezkûr ve bir tarafdan tarîk-i âm ile mahdûd altı dönüm mikdârı bir kıt‘a ve yine karye-i merkūme Kayaaltı nâm mahâlde vâki‘ bir tarafdan Dağlıoğlu tarlası ve bir tarafdan Hacı Ali tarlası ve bir tarafdan su harkı ve bir tarafdan Tombakoğlu tarlası ile mahdûd dört dönüm mikdârı bir kıt‘a ve yine Aşağıtarla nâm mahâlde vâki‘ bir tarafdan Tombakoğlu tarlası ve bir tarafdan Ömerbeyoğlu tarlası ve bir tarafdan cebel ve bir tarafdan tarîk-i âm ile mahdûd iki dönüm mikdârı bir kıt‘a ve yine Acıkiraz nâm mahâlde kâin bir tarafdan Tombakoğlu İbrahim tarlası ve bir tarafdan Kumcuoğlu tarlası ve bir tarafdan cebel ve taraf-ı râbi‘i tarîk-i âm ile mahdûd dört dönüm mikdârı bir kıt‘a ve yine Kocakarı Ahladı nâm mahâlde vâki‘ bir tarafdan Kumcuoğlu tarlası ve bir tarafdan çayır ve bir tarafdan el-Hâc Ali tarlası ve bir tarafdan tarîk-i âm ile mahdûd dört dönüm mikdârı bir kıt‘a ki cem‘an yedi kıt‘a tarla mezbûr İsmail Ağa’nın bâ-tapu müstakillen taht-ı tasarrufunda iken yedimde olup bin iki yüz yetmiş senesi Zilhicceti’ş-şerîfesinin yirmi ikinci günü târîhiyle müverraha İstanbul Bâb Mahkemesi’nden verilen işbu bir kıt‘a hüccet-i şer‘iyye mûcebince mezbûr İsmail Ağa ber-minvâl-i muharrer mutasarrıf olduğu tarlahâ-yı merkūmeyi cem‘an on bin guruş bedel tesmiyesiyle bilâ-re’y-i sâhib-i arz bana fâriğ olduğunu huzûr-ı şer‘de takrîr edip bedel-i mezkûrun mutâlebesinden dahi benim zimmetimi kabûlümü hâvî ibrâ ve iskāt ve ba‘dehû huzûr-ı sâhib-i arzda be-tekrâr ferâğ-ı mezkûru takrîr ve îcâb eden tapu senedlerini cânib-i Defterhâne-i âmire’den bi’l-istihsâl bana i‘tâ ve teslîme ta‘ahhüd etmiş iken mezbûr İsmail Ağa huzûr-ı sâhib-i arzda ferâğ-ı mezkûru takrîr etmeyip ve sâhib-i arzın re’yi munzam olmadığından mâ‘adâ husûs-ı mezkûrdan bu esnâda nükûl ve tarlahâ-yı merkūmeyi bana teslîmden ibâ vü imtinâ‘ eder olmağla, suâl olunup ferâğ-ı mezkûrunu huzûr-ı sâhib-i arzda dahi vech-i muharrer üzere takrîr ve tarlahâ-yı mezkûreyi mahâllerinde bana teslîme mezbûr İsmail Ağa[ya] cebr ve tenbîh olunmak murâdımdır deyü takrîr-i meşrûhu üzere bilâ-re’y-i sâhib-i arz arazi-yi mîriyenin ferâğı şer‘an ve nizâmen sahîh ve mu‘teber olmadığına binâen tasaddî eylediği da‘vâsı dahi mesmû‘a ve iltifâta şâyân olmadığı müdde‘î-i mezbûr Ali Ağa’ya tefhîm ve mûcebince da‘vâ-i mezkûresiyle mezbûr İsmail Ağa’ya bî-vech-i şer‘î mu‘ârazadan men‘ olunduğu tescîl ve huzûr-ı [âlîlerine i‘lâm olundu]. Fî 8 L sene [12]73. Ser-ketebe.