Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 89 Hüküm no: 67 Orijinal metin no: [13a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eskici esnafından Mehmed’in Yunanlı Kunduracı Yorgi v. Manol ve kardeşi Manol ile Yorgi v. Andon aleyhindeki alacak davasının kabul olunmadığı Mübâşiri mezbûra teslîm. Ma‘rûz, İstanbul’da Parmakkapı nâm mahâlde Eskici esnâfından Mehmed b. Mustafa mahfil-i şer‘iyyâtda Yunanlı Kunduracı Yorgi ve li-ebeveyn er karındaşı Manol v. Manol ve diğer Yorgi v. Andon muvâcehelerinde Yunan tercümânı Yorgi hâzır olduğu hâlde ben işbu târîh-i i‘lâm günü merkūmûnun taht-ı icârelerinde olan İstanbul’da Haffâfhânebaşı nâm mahâlde vâki‘ kunduracı dükkânına gidip bir çift kundura iştirâ eylediğim hînde malım olup koyun cebimde bir aded kese derûnunda mevcûd olan üç aded mecidiye ve bir aded İngiliz altını ve bir aded Fransız nısfiyesi altını ve bir aded beyaz yirmilik karbon ve bir aded beyaz beşlik ve yirmi beş guruşluk yirmi paralık beyaz akçe ile mecmû‘u iki yüz guruş kıymetli bir aded tesbîh ve bir aded miftâh ve bir aded Kalemis yağı kutusu ve bir aded akīk yüzüğümü dükkân-ı mezkûr önünde zâyi‘ edip merkūmûnun aldıkları gerçi ma‘lûmum değil ise de mücerred merkūmûnun mütemekkin oldukları dükkân-ı mezkûr önünde zâyi‘ olduğuna binâen merkūmûndan şüphem olmamla binâen-aleyh nukūd-ı merkūmenin emsâlini ve eşyâ-yı merkūmenin dahi a‘yânını bana tamâmen vermek üzere merkūmûna cebr ve tenbîh olunmak murâdımdır deyü takrîr-i meşrûhu üzere tasaddî eylediği da‘vâsı bu mertebe ile meşrû‘a ve iltifâta şâyân olmadığı kendüye tefhîm ve mûcebince da‘vâ-i mezkûresiyle merkūmûn Yorgi ve Manol ve diğer Yorgi’ye bî-vech-i şer‘î mu‘ârazadan men‘ olunduğu mübâşirleri Bâb-ı Zabtiye neferâtından Arabgirli Mehmed Ağa kulları yediyle huzûr-ı [âlîlerine i‘lâm olundu]. Fî 17 L sene [12]73. Ser-ketebe.