Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 90 Hüküm no: 69 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ağa’nın üvey oğlu Yusuf Ağa ile ortak olduğu şirketi fesh ve Yusuf’ta olan alacağını tahsil etmesi Cerîde? Mahrûse-i Galata’ya muzâfe kasaba-i Tophane’de Nusret Câmi‘-i envâr-ı lâmi‘i karşısında şekerci esnâfından bâ‘isü’l-i‘lâm el-Hâc Osman Ağa b. Ahmed mahfil-i şer‘iyyâtda üveyi oğlu esnâf-ı merkūmeden Yusuf Ağa b. Halil muvâcehesinde mezbûr el-Hâc Osman Ağa’nın sulbî kebîr oğlu Mehmed Salim Ağa hâzır olduğu hâlde ben bin iki yüz altmış beş senesi şehr-i Rebî‘ülevvel gurresi gününden sene-i sâbıkā ya‘ni bin iki yüz yetmiş iki senesi Saferi’l-hayrı gāyetine gelince yedi sene müddet üveyi oğlum mezbûr Yusuf Ağa ile câmi‘-i şerîf-i mezkûr karşısında şekerci dükkânında tarafeynden sermâye vaz‘ıyla merkūm Yusuf Ağa ile kabz-ı mâl olduğu hâlde şekercilik ticâretinden inânen şerîkler olup ba‘dehû fesh-i akd-i şirket birle hesâbını oğlum mezbûr Yusuf Ağa ile mahzar-ı şuhûdda sehv ü galatdan ârî yegân yegân sahîhan rü’yet eylediğimizde benim mezbûr Yusuf Ağa zimmetinde gerek re’s-i mâl ve gerek fâide-i hâsıladan gayrı-ez teslîmât sahhü’l-bâkī yedi yüz guruş alacak hakkım zuhûr etdikde hesâb-ı mezkûr sahîhan rü’yet olunup meblağ-ı merkūm yedi yüz guruşu bana zimmetinde lede’l-muhâsebe sahîhan deyni olduğunu ba‘de’l-ikrâr meblağ-ı mezkûr yedi yüz guruşu bu def‘a bana def‘ ü teslîm eylediğinde, ben dahi yedinden tamâmen ve kâmilen ahz ü kabz etmemle bi’l-cümle husûs-ı şirketimize müte‘allıka da‘vâdan ben üveyi oğlum mezbûr Yusuf Ağa ile oğlum hâzır-ı mezbûr Mehmed Salim Ağa’nın zimmetlerini ibrâ-i sahîh-i şer‘î ile ibrâ ve iskāt eylediğimde onlar dahi kezâlik husûs-ı şirkete müte‘allıka da‘vâdan benim zimmetimi ibrâ-i sahîh-i şer‘î ile ibrâ ve iskāt ve tarafeynden her birimiz ber-vech-i muharrer âharın ibrâsını kabûl eyledik deyü mukırr-ı mezbûr el-Hâc Osman Ağa’nın sâdır olan bi’l-cümle kelimât-ı meşrûhasını mezbûrân Yusuf Ağa ve Mehmed Salim Ağa’dan her biri tasdîk ve tahkīk edip bu vechile kat‘-ı münâza‘a ve ref‘-i muhâsama eyledikleri tescîl ve bi’l-iltimâs huzûr-ı [âlîlerine i‘lâm olundu]. Fî 21 L sene [12]73. Akif.