Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 91 Hüküm no: 70 Orijinal metin no: [13b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafize Hatun’un, Meryem Kadın aleyhindeki hakaret davasının reddedilmesi Mübâşiri Arabgirli Mehmed Zabtiye’ye teslîm. Ma‘rûz, İstanbul’da Küçük Pazar kurbünde Hoca Hayreddin mahâllesinde sâkine mu‘arrefetü’z-zât Şerîfe Hafize Hatun bt. es-Seyyid Mustafa mahfil-i şer‘iyyâtda yine mahâlle-i mezbûrede sâkine bâ‘isetü’l-i‘lâm kezâlik mu‘arrefetü’z-zât Zenciye Maverdi nâm-ı diğer Meryem Kadın bt. Abdullah muvâcehesinde mezbûre Maverdi Kadın işbu sene-i mübâreke Şevvâli’l-mükerremi’nin yirmi beşinci günü mahâlle-i merkūmede vâki‘ sâkine olduğum menzilime gelip bana muvâcehemde bi-gayrı hakkın fâhişe ve kârhâneci deyü iftirâ ve ta‘zîr-i şer‘îyi mûcib elfâz-ı kabîha ile şetm etmekle suâl olunup mûceb-i şer‘îsi icrâ olunmak murâdımdır deyü ba‘de’d-da‘vâ ve’l-istintâk ve’l-inkâr müdde‘iye-i merkūme Şerîfe Hafize Hatun ber-vech-i muharrer müdde‘âsını isbâtdan izhâr-ı acz edip istihlâf etdikde mezbûre Maverdi Kadın bi’l-muvâcehe ber-nehc-i şer‘î tahlîf olunmağın mûcebince müdde‘iye-i mezbûre Şerîfe Hanife Hatun da‘vâ-i mezkûresiyle merkūme Maverdi Kadın’a bilâ-beyyine mu‘ârazadan men‘ olunduğu huzûr-ı [âlîlerine i‘lâm olundu]. Fî 2 Ra sene [12]73. Hasan.