Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 92 Hüküm no: 71 Orijinal metin no: [13b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Damyol v. Nikola’nın borcu karşılığında İspiro v. Dimitri’ye sattığı tarla ve çayır yerlerinin satış işleminin geçersiz olması Çizmeci Ahmed Kavvâs’a teslîm. Ma‘rûz, Vilâyet-i Rumeli’de Ohri sancağına tâbi‘ Boravis karyesi ahâlîsinden ve Devlet-i aliyye teba‘asının Rum milletinden Ekmekçi tablakârı arzuhâl eden Damyol v. Nikola mahfil-i şer‘iyyâtda yine karye-i mezbûre ahâlîsinden <> olup zikri âtî tarla ve çayır yerlerine hâlâ vaz‘-ı yedi inde’ş-şer‘i’l-enver zâhir ve mütehakkık olan derûn-ı arzuhâlde mezkûrü’l-ism Ekmekçi tablakârı İspiro v. Dimitri muvâcehesinde ben işbu târîh-i i‘lâmdan beş sene mukaddem merkūm İspiro’nun malından ve yedinden iktirâz ve kabz ve umûruma sarfla istihlâk eylediğim yedi yüz yetmiş beş guruş deynim mukābelesinde arazi-i mîriyeden olarak bâ-temessük-i sâhib-i arz müstakillen taht-ı tasarrufumda bulunan karye-i mezkûre hudûdu dâhilinde vâki‘ her biri ma‘lûmü’l-hudûd ve’l-müştemilât dokuz kıt‘a tarla ve üç kıt‘a çayır yerlerini bilâ-izn-i sâhib-i arz merkūm İspiro’ya kat‘iyyen ferâğ ve teslîm etmiş idim. Lâkin ferâğ-ı mezkûra henüz re’y-i sâhib-i arz munzam olmadığından ben ferâğ-ı mezkûrumdan rücû‘ etmemle el-hâletü hâzihi deynim olan meblağ-ı mezkûru yedimden ahz ü kabz birle zikirleri mürûr eden tarlahâ ve çayır yerlerinden keff-i yed ve mahâllerinde bana teslîme merkūm İspiro’ya tenbîh olunmak murâdımdır deyü ba‘de’d-da‘vâ ve’l-istintâk ol dahi cevâbında zikr olunan tarlahâ ve çayır yerlerine el-yevm vaz‘-ı yedini ikrâr u i‘tirâf edip lâkin müdde‘î-i merkūm Damyol ber-vech-i muharrer mutasarrıf olduğu zikirleri mesbûk dokuz kıt‘a tarla ve üç kıt‘a çayırlarını mücerred fi’l-vâki‘ bilâ-izn-i sâhib-i arz deyn-i meblağ-ı mezkûr mukābelesinde bana kat‘iyyen ferâğ ve tefvîz ve mahâllerinde teslîm eylediğinde ben dahi ber-minvâl-i muharrer tefevvüz ve kabûl edip ol vechile zikirleri sebkat eden dokuz kıt‘a tarla ve üç kıt‘a çayır yerleri benim dâhil-i havza-i tasarrufum olmuş olmağla binâen-aleyh redd ü teslîmden ibâ vü imtinâ‘ ederim deyü makām-ı def‘de îrâd eylediği kelâmı re’y-i sâhib-i arz henüz munzam olmadığını mukır ve mu‘terif bulunduğundan mesmû‘a ve iltifâta şâyân olmadığı merkūm İspiro’ya [14a] ba‘de’t-tefhîm mûcebiyle meblağ-ı mezkûr yedi yüz yetmiş beş guruşu müdde‘î-i merkūmun ahz ü kabz birle zikirleri güzerân eden dokuz kıt‘a tarla ve üç kıt‘a çayırlarından keff-i yed ve mahâllerinde müdde‘î-i merkūm Damyol’a red ve teslîme merkūm İspiro’ya tenbîh olunduğu huzûr-ı [âlîlerine i‘lâm olundu]. Fî 6 Ra sene [12]73. Raşid.