Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 93 Hüküm no: 72 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Efendi’nin Bakkal Vasil aleyhindeki alacak davasından men olunması Mübâşir-i mezbûra teslîm. Ma‘rûz, Vilâyet-i Anadolu’da Harput kazâsı ahâlîsinden es-Seyyid el-Hâc Ömer Efendi b. Hâfız Mustafa mahfil-i şer‘iyyâtda İstanbul’da Şehzâde Sultân Mehmed -aleyhi’r-rahmetü Rabbihi’s-samed- hazretleri câmi‘-i şerîfi civârında Acemoğlu Meydanı nâm mahâlde vâki‘ bakkāl dükkânında sâkin teba‘a-i Devlet-i aliyye’den ve bakkāl esnâfından bâ‘isü’l-i‘lâm Vasil v. İlya muvâcehesinde ben işbu târîh-i i‘lâmdan beş gün mukaddem mârrü’z-zikr Acemoğlu Meydanı nâm mahâlde vâki‘ merkūmun dükkânı önünden geçer iken saltamarkamın koyun cebinde olan on guruş kıymetli bir aded cüzdan ile cüzdan-ı merkūm derûnunda mevzû‘ emvâlim olan iki bin dokuz yüz guruşa mu‘âdil ve beyne’n-nâs nakid hükmünde mütedâvil yüz kırk beş aded yirmilik ve bir adedi onluk cem‘an yüz kırk altı aded kavâim-i mütedâvile mârrü’l-beyan Saltamarkanın koyun cebinden kazâen düşdükde işbu merkūm Vasil fuzûlî ve bi-gayrı hakkın hufyeten ahz ü kabz ve istihlâk etmekle ol vechile merkūm Vasil zimmetinde damânen alacak hakkım olan meblağ-ı mezkûr iki bin dokuz yüz on guruş ve mezkûr cüzdanın semeni olan meblağ-ı merkūm on guruş ki cem‘an iki bin dokuz yüz yirmi guruşu merkūm Vasil’den bi-tarîkı’d-damân hâlâ taleb ederim deyü ba‘de’d-da‘vâ ve’l-inkâr müdde‘î-i mezbûr es-Seyyid el-Hâc Ömer Efendi ber-vech-i muharrer müdde‘âsını isbâtdan izhâr-ı acz edip talebiyle merkūm Vasil’e bi’l-muvâcehe vech-i şer‘î üzere yemîn verilmeğin mûcebince müdde‘î-i mezbûr es-Seyyid el-Hâc Ömer Efendi da‘vâ-i mezkûre[siyle] merkūm Vasil’e bilâ-beyyine mu‘ârazadan men‘ olunduğu tescîl ve mübâşirleri Bâb-ı Zabtiye Neferâtından Çemişgezekli Hüseyin Ağa yediyle huzûr-ı [âlîlerine i‘lâm olundu]. Fî 17 Ra sene [12]73. Ser-ketebe.