Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 93 Hüküm no: 73 Orijinal metin no: [14a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüfenkçi esnafından Halil’in, oğlu Feyzullah aleyhindeki alacak davasında anlaşma sağlanması Kemahlı Hacı Mustafa Çavuş’a teslîm. İstanbul’da Cumartesi Pazarı kurbünde Molla Ahaveyn mahâllesi sâkinlerinden ve Tüfenkçi esnâfından Halil b. Feyzullah Bâbıâlîlerine takdîm olunan arzuhâl bâlâsına sâdır olan fermân-ı âlîlerine imtisâlen mahfil-i şer‘iyyâtda mezbûrun sulbî kebîr oğlu Feyzullah Ağa muvâcehesinde esnâf-ı merkūme kethüdâsı Ali Bey b. Abdullah ve esnâfdan Kütahyalı Ali Usta b. Salih ve Arnavud Said Usta b. Murad ve Mehmed Usta b. Salih ve Mehmed Ali Usta b. Yakub ve el-Hâc Hüseyin Usta b. Mehmed nâm kimesneler hâzır oldukları hâlde oğlum mezbûr Feyzullah Ağa ile İstanbul’da Parmakkapı nâm mahâlde vâki‘ müsteciren sâkin olduğum tüfenkçi dükkânında bir müddet tüfenk ta‘mîr ve i‘mâl edip ve müddet-i mezbûrede ücretimiz olarak hâsıl olan nakid beş bin guruşu oğlum mezbûr ile ma‘an kethüdâ-i hâzır-ı mezbûr Ali Bey’e bi’l-ma‘iyye îdâ‘ ve teslîm eylediğimizde ol dahi ber-minvâl-i muharrer istîdâ‘ ve kabz ve kabûl etdikden sonra oğlum mezbûr Feyzullah Ağa meblağ-ı mezbûr beş bin guruşu emr ü tevkîlimle bi’l-asâle ve bi’l-vekâle kethüdâ-i hâzır-ı mezbûrdan tamâmen ve kâmilen ahz ü kabz ve nısfı olan iki bin beş yüz guruşu bana vermeyip fuzûlî ve bi-gayrı hakkın kendi umûruna sarfla istihlâk etmekle meblağ-ı mezkûr iki bin beş yüz guruşu bi-tarîkı’d-damân hâlâ bana edâ ve teslîme oğlum mezbûr Feyzullah Ağa’ya tenbîh olunmak murâdımdır deyü tasaddî eylediğim da‘vâmdan bâ-tavassut-ı muslihîn oğlum mezbûr Feyzullah Ağa ile bi’t-tav‘ ve’r-rızâ bin guruş üzerine sulh olduğumda ol dahi sulh-ı merkūmu ba‘de’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra müte‘allıka âmme-i da‘vâdan oğlum mezbûr Feyzullah Ağa’nın zimmetini ibrâ-i âmm-ı sahîh-i şer‘î ile ibrâ ve iskāt eylediğimde ol dahi vâlidesi olup bundan akdem vefât eden Emetullah bt. Süleyman b. Abdullah nâm hatunun terekesinden hisse-i ırsiye mutâlebesine müte‘allıka âmme-i da‘vâdan kezâlik benim zimmetimi ibrâ-i âmm-ı sahîh-i şer‘î ile ibrâ ve iskāt ve tarafeynden her birimiz ber-vech-i muharrer âharın ibrâsını kabûl eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr bin guruşu müdde‘î-i mezbûr Halil Ağa’ya bi’t-taleb edâ ve teslîme mezbûre Feyzullah Ağa’ya tenbîh olunduğu huzûr-ı [âlîlerine i‘lâm olundu]. Fî 16 L sene [12]73. Ser-ketebe.