Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 94 Hüküm no: 74 Orijinal metin no: [14a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zineti Hatun’un Ömer Ağa’dan boşanması Başefendi’ye teslîm. İstanbul’da Ebulfeth Gāzî Sultân Mehmed Han -aleyhi rahmetü’l-gufrân- hazretleri câmi‘-i şerîfi kurbünde Mimarsinan nâm-ı diğer Kumrulu Mescid mahâllesinde sâkine bâ‘isetü’l-i‘lâm mu‘arrefetü’z-zât Şerîfe Zîneti Hatun bt. Mehmed mahfil-i şer‘iyyâtda zevc-i mutallıkı sepetçi esnâfından Ömer Ağa b. Mehmed muvâcehesinde mezbûr Ömer Ağa üç yüz guruş mehr-i mu‘accel ve üç yüz bir [14b] guruş mehr-i müeccel tesmiyeleriyle zevc-i dâhilim iken işbu târîh-i i‘lâmdan üç gün mukaddem beni bâyinen tatlîk etmekle zimmetinde mütekarrir ve ma‘kūdün-aleyh mehreyn-i mezkûreynim olan cem‘an altı yüz bir guruşu işbu meclis-i şer‘de bana tamâmen edâ ve teslîm eylediğinde ben dahi yedinden ba‘de’l-kabz mâ‘adâ nafaka-i iddet-i mu‘ayyene-i ma‘lûmem ve meûnet-i süknâm için bi’t-terâzî beynimizde ta‘yîn olunan üç yüz guruşu dahi mezbûr Ömer Ağa hîn-i vakt-i istihkākda bana edâ ve îfâya ta‘ahhüd edip ben dahi ta‘ahhüdünü kabûl etmemle meblağ-ı merkūm üç yüz guruşdan mâ‘adâ hukūk-ı zevciyete müte‘allıka âmme-i da‘vâdan tarafeynden her birimiz âharın zimmetini ibrâ-i sahîh-i şer‘î ile ibrâ ve iskāt eyledik deyü tarafeynin ikrâr ve tasdîkleri tescîl ve bi’l-iltimâs huzûr-ı [âlîlerine i‘lâm olundu]. Fî 19 Za sene [12]73. el-Hâc İbrahim.