Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 95 Hüküm no: 75 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un Hatice Hatun aleyhindeki elmas iğne davasında anlaşma sağlanması Zabtiye neferâtından Arabgirli Mehmed’e teslîm. Ma‘rûz, İstanbul’da Çenberlitaş kurbünde Kapıağası Sinan Ağa mahâllesinde sâkine mu‘arrefetü’z-zât Fâtıma Hatun bt. el-Hâc Ataullah mahfil-i şer‘iyyâtda yine mahâlle-i mezbûrede sâkine bâ‘isetü’l-i‘lâm kezâlik mu‘arrefetü’z-zât Hadîce Hatun bt. Mehmed muvâcehesinde ben işbu târîh-i i‘lâm şehrinin dördüncü [günü] yedimde malım olan beher adedi dokuz yüz guruş kıymetli lokum? resminde sîm üzerine masnû‘ iki aded elmas iğnemi mezbûre Hadîce Hatun’a i‘âre ve teslîm eylediğimde ol dahi yedimden isti‘âre ve kabz ve kabûl eylediğinden sonra mezbûre Hadîce Hatun mârrü’l-beyan iğnelerin ancak bir adedini bana redd ü teslîm etmiş ise de mâ‘adâ bir adedini bana vermeyip ta‘addî ve taksîrden nâşî zâyi‘ olmağla ol vechile zâyi‘ olan mârrü’z-zikr bir aded iğnenin yevm-i helâkda masnû‘an kıymeti olup mezbûre Hadîce Hatun zimmetinde bi-tarîkı’d-damân alacak hakkım olan meblağ-ı mezkûr dokuz yüz guruşu mezbûre Hadîce Hatun’dan damânen taleb ederim deyü tasaddî eylediğim da‘vâmdan an-inkâr bâ-tavassut-ı muslihûn mezbûre Hadîce Hatun ile bi’t-tav‘ ve’r-rızâ beş yüz guruş üzerine sulh olduğumda ol dahi sulh-ı mezkûru ba‘de’l-kabûl bedel-i sulh-ı mezkûr beş yüz guruşu işbu meclis-i sulhda kable mufârakati’l-ebdân bana def‘ ü teslîm eylediğinde ben dahi yedinden tamâmen ahz ü kabz etmemle ziyâde müdde‘âma ve bi’l-cümle husûs-ı mezkûra ve işbu târîh-i i‘lâma gelince sâir cemî‘ hukūk-ı şer‘iyyeye müte‘allıka âmme-i da‘vâdan tarafeynden her birimiz âharın zimmetini ibrâ-i amm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eylediğimizden sonra ben mezbûre Hadîce Hatun’a <> malımdan beş yüz guruş ikrâz ve teslîm eylediğimde ol dahi yedimden iktirâz ve kabz ve umûruna sarfla ba‘de’l-istihlâk mezbûre Hadîce Hatun zimmetinde cihet-i karzdan alacak hakkım olan meblağ-ı merkūm beş yüz guruşu mezbûre Hadîce Hatun çend rûz zarfında bana edâ ve teslîme ta‘ahhüd eyledi deyü mukırra-i mezbûre Fâtıma Hatun’un sâdıra olan bi’l-cümle takrîr-i meşrûhunu mezbûre Hadîce Hatun tasdîk ve tahkīk eylediği tescîl ve mübâşirleri Bâb-ı Zabtiye kavvâslarından Arabgirli Mehmed Ağa kulları yediyle huzûr-ı [âlîlerine i‘lâm olundu]. Fî 13 Za sene [12]73. Raşid.