Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 96 Hüküm no: 76 Orijinal metin no: [14b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Said Ağa’ya itaat etmesi hususunda eşi Hafize Hatun’a tenbihte bulunulması Mübâşir-i mezbûra teslîm. Yazmacı esnâfından bâ‘isü’l-i‘lâm es-Seyyid Mehmed Said Ağa b. es-Seyyid Hüseyin nâm kimesne mahfil-i şer‘iyyâtda İstanbul’da Aksaray civârında Koğacıdede mahâllesinde sâkine mu‘arrefetü’z-zât Hafize Hatun bt. Abdullah muvâcehesinde mezbûre Hafize Hatun beş yüz bir guruş mehr-i müeccel tesmiyesiyle zevce-i menkûha-i medhûlün-bihâm olup lâkin benim zikr olunan Aksaray kurbünde Muradpaşa-i atik mahâllesinde vâki‘ sâkin olduğum menzilime gelip bana itâ‘at ve inkıyâd ve hukūk-ı zevciyete mürâ‘ât etmemekle suâl olunup menzil-i mezkûruma gelip ke’l-evvel bana itâ‘at ve inkıyâd ve hukūk-ı zevciyete mürâ‘ât etmek üzere zevcem mezbûre Hafize Hatun’a tenbîh olunmak murâdımdır deyü ba‘de’d-da‘vâ ve’l-istintâk ol dahi cevâbında müdde‘î-i mezbûr es-Seyyid Mehmed Said Ağa’nın ol mikdâr guruş mehr-i müeccel tesmiyesiyle zevce-i menkûha-i medhûlün-bihâsı olduğunu tâyi‘an ve kat‘iyyen ikrâr u i‘tirâf etmeğin mûcebince zevce-i müdde‘î-i mezbûr es-Seyyid Mehmed Said Ağa’nın menzil-i mezkûruna gidip kendüye itâ‘at ve inkıyâd ve hukūk-ı zevciyete mürâ‘ât etmek üzere mezbûre Hafize Hatun’a tenbîh olunduğu tescîl ve mübâşirleri Bâb-ı Zabtiye neferâtından Arabgirli Mehmed Ağa yediyle huzûr-ı [âlîlerine i‘lâm olundu]. Fî 15 Za sene [12]73. Akif.