Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 96 Hüküm no: 77 Orijinal metin no: [14b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden İslamoğlu Hüseyin Ağa’nın oğlu Hüseyin Ağa’nın Bedros aleyhindeki eşya rehni davası Mübâşiri Cerhacı Ahmed Kavvâs’a teslîm. Fi’l-asl vilâyet-i Anadolu’da Kemah kazâsı ahâlîsinden medîne-i Üsküdar’a muzâfe Beylerbeyi karyesinde sâkin bahçıvan tâifesinden iken işbu târîh-i i‘lâmdan altı ay mukaddem vefât eden İslamoğlu Hüseyin Ağa b. el-mezbûr İslâm b. Abdullah’ın sulbî oğlu ve hasran vârisi olduğu bâ-i‘lâm-ı şer‘î sâbit ve mütehakkık olan sâhib-i arzuhâl Hüseyin Ağa mahfil-i şer‘iyyâtda Devlet-i aliyye teba‘asının Ermeni milletinden ve ekmekçi esnâfından derûn-ı arzuhâlde mezkûrü’l-ism Bedros v. Ağya muvâcehesinde pederim ve mûrisim müteveffâ-yı mezbûr Hüseyin Ağa hayâtında merkūm Bedros’a nân-ı azîz semeninden zimmetinde deyni olan yüz guruş mukābelesinde yedimde emvâli olan dört yüz guruş kıymetli on üç [15a] aded sîm zarf ve yüz elli guruş kıymetli beş aded sîm kaşık ve üç bin guruş kıymetli altın üzerine masnû‘ tek taşlı bir aded elmas yüzüğünü rehin vaz‘ ü teslîm eylediğinde ol dahi yedinden ber-vech-i muharrer irtihân ve teslîm ve kabz ve kabûl eyledikden sonra meblağ-ı mezkûr yüz guruşu merkūm Bedros’a kable’l-edâ ve’l-îfâ fevt oldukdan sonra deyn-i meblağ-ı mezkûr yüz guruşun elli guruşunu esmân-ı tereke-i müteveffâ-yı merkūmdan olarak merkūm Bedros’a def‘ ü teslîm edip bâkīsi olan elli guruşu dahi dâyin-i merkūma edâ ve teslîme, ol dahi rihân-ı muharrere-i merkūmeyi rehniyetden fekk ü tahlîs ve bana teslîme tarafeynden her birimiz ta‘ahhüd etmiş idik. El-hâletü hâzihi merkūm Bedros rihân-ı muharrere-i merkūmeden zikr olunan on üç aded zarfları tebdîl ve ma‘den zarf olarak bana def‘ ü teslîm murâd eylediğinden mâ‘adâ zikirleri mürûr eden kaşık ve yüzükleri bana teslîmden ibâ vü imtinâ‘ eder olmağla suâl olunup meblağ-ı bâkī-i mezkûr elli guruşu dahi yedimden ahz ü kabz birle zikirleri mesbûk sîm zarf ve kaşık ve yüzüğü rehniyetden fekk ü tahlîs ve bana teslîme merkūm Bedros’a tenbîh olunmak murâdımdır deyü ba‘de’d-da‘vâ ve’l-istintâk, ol dahi cevâbında müteveffâ-yı mezbûr Hüseyin Ağa hayâtında semen-i mezkûrdan ol mikdâr guruşu deyni mukābelesinde malından sâlifü’l-beyan on üç aded ma‘den zarf rehin vaz‘ ve bana teslîm ve ba‘dehû edâ-yı deyn ile zikr olunan zarfları rehniyetden fek ü tahlîs etmeksizin fevt oldukdan sonra müdde‘î-i merkūm Hasan Ağa meblağ-ı merkūm yüz guruşun elli guruşunu bana edâ ve îfâ ve ben dahi rehin olan mârrü’z-zikr on üç aded ma‘den zarfları rehniyetden fekk ü tahlîs ve kendüye i‘tâ ve teslîm etmiş idim deyüb müdde‘î-i mezbûrun mâ‘adâ ber-minvâl-i muharrer müdde‘âlarını red etmekle müdde‘î-i mezbûr Hasan Ağa ber-minvâl-i meşrûh müdde‘âlarını isbâtdan izhâr-ı acz edip istihlâf etdikde merkūm Bedros’a zikr olunan zarfları tebdîl etmediğine ve mâ‘adâlarını dahi adem-i kabzına şer‘an yemîn lâzım geldiğine binâen müdde‘î-i mezbûr Hasan Ağa’nın talebiyle merkūm Bedros’a bi’l-muvâcehe vech-i şer‘î üzere yemîn verilmeğin mûcebince müdde‘î-i merkūm Hasan Ağa da‘vâ-i mezkûresiyle merkūm Bedros’a bî-vech-i şer‘î bilâ-beyyine mu‘ârazadan ba‘de’l-men‘ müdde‘î-i merkūm Hasan Ağa’nın ikrâr ve i‘tirâfı üzere lâzım gelen meblağ-ı bâkī-i mezkûr elli guruşu merkūm Hasan Ağa’dan tahsîl merkūm Bedros’a teslîm olunmak iktizâ eylediği huzûr-ı [âlîlerine i‘lâm olundu]. Fî 16 Ra sene [12]73. Akif.