Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 98 Hüküm no: 78 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Halil’in üvey babası Mehmed aleyhindeki ücret iddiasından vazgeçmesi Divriğli Hasan Çavuş’a teslîm. Vilâyet-i Anadolu’da Nevşehir kazâsı ahâlîsinden ve rençber tâifesinden sâhib-i arzuhâl Ahmed b. Halil mahfil-i şer‘iyyâtda üveyi pederi yine kazâ-i mezkûr ahâlîsinden derûn-ı arzuhâlde mezkûrü’l-ism Mehmed b. Ali nâm kimesne muvâcehesinde ben işbu târîh-i i‘lâmdan üç sene mukaddem üveyi pederim mezbûr Mehmed’in talebiyle kazâ-i mezkûrda vâki‘ bâ-temessük-i sâhib-i arz müstakillen taht-ı tasarrufunda bulunan ma‘lûmü’l-hudûd bir kıt‘a tarlasında otuz altı ay müddet ber-mu‘tâd rençberlik etmemle ecr-i mislim olan yevmiye onar guruşdan müddet-i merkūmede iktizâ eden cem‘an on bin seksen guruşu üveyi pederim mezbûr Ahmed’den hâlâ taleb ederim deyü tasaddî eylediğim da‘vâmdan rızâmla meccânen fâriğ olmamla mütâlebesine müte‘allıka âmme-i da‘vâdan üveyi pederim mezbûrun zimmetini ibrâ-i sahîh-i şer‘î ile kabûlüne hâvî ibrâ ve iskāt eyledim deyü ikrâr ve tasdîkleri tescîl ve huzûr-ı [âlîlerine i‘lâm olundu]. Fî 12 Ş sene [12]73 Akif