Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 98 Hüküm no: 79 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha Sabire Hanım’ın vefat eden babası Osman Ağa’dan intikal eden menzil ve müştemilatındaki hissesini diğer varislerden taleb etmesi Ma‘rûz, İstanbul’da Tavukpazarı civârında Hüseyin Ağa mahâllesinde sâkin iken bundan akdem vefât eden el-Hâc Osman Ağa b. Abdullah b. Abdurrahman’ın verâseti zevce-i menkûha-i metrûkesi Nefise Hatun bt. Abdullah ile sulbiye kebîre kızları Saliha Sabire ve Hafize Hanımlara münhasıra ba‘dehû kable’l-kısmet bint-i mezbûre Hafize Hanım dahi vefât ve verâseti zevc-i metrûkü mefkūd Mehmed Ağa b. Abdullah ile vâlidesi mezbûre Nefise Hatun ve sadrî kebîr oğlu Hasan Efendi ve sadriye kebîre kızı Fâtıma Hanım ve sadriye sagīre kızı Hadîce Hanım’a münhasıra ve tashîh-i mesele-i mîrâsları bi-hükmi’l-münâsahati’ş-şer‘iyye yedi yüz altmış sekiz sehmden olup sihâm-ı mezbûreden yüz elli iki guruş sehmi mezbûre Nefise Hatun’a ve üç yüz otuz altı sehmi mezbûre Saliha Sabire Hanım’a ve seksen dört sehmi mezbûr Mehmed Ağa’ya ve doksan sekiz sehmi mezbûr Hasan Efendi’ye ve kırk dokuz sehmden cem‘an doksan sekiz sehmi mezbûretân Fâtıma ve Hadîce hanımlardan her birine isâbeti lede’ş-şer‘i’l-enver zâhir ve mütehakkık oldukdan sonra verese-i mezbûrûndan olup hâlâ medîne-i İzmir’de Câmi‘-i atik mahâllesinde sâkine olan mezbûre Saliha Sabire Hanım’ın hâlâ zevci olup tarafından zikri âtî husûsda bâ-mazbata vekâlet iddi‘â eden Asâkir-i hâssa-i şâhâne binbaşılarından sâhib-i arzuhâl fütüvvetlü Mustafa Necib Efendi b. Halil mahfil-i şer‘iyyâtda zikri âtî ma‘a müştemilât-ı dekâkîn bir bâb menzile el-yevm ber-vech-i iştirâk vaz‘-ı yedi inde’ş-şer‘i’l-enver zâhir ve mütehakkık olan merkūm Hasan Efendi ve zâtı mu‘arrefe mezbûre Fâtıma Hanım muvâcehelerinde kendi nefsinden asıl ve sagīre-i merkūmenin min-kıbeli’l-üm ceddesi ve tesviye-i umûruna kıbel-i şer‘den vasiyy-i mansûbesi kezâlik mu‘arrefetü’z-zât mezbûre Nefise Hanım hâzıra olduğu hâlde hâzıra-i asıl ve vasiyy-i merkūme Nefise Hanım’ın yedinde olup bin iki yüz yetmiş bir senesi Şa‘bâni’l-mu‘azzamın dokuzuncu günü târîhiyle müverraha ve ol târîhde İstanbul’da Mahmudpaşa Mahkemesi’nde nâibü’ş-şer‘ bulunan mevâlî-i izâmdan fazîletlü Mehmed Tevfik Efendi’nin imzâ ve hatemini hâviye işbu bir kıt‘a hüccet-i şer‘iyyede tafsîlen zikr ü beyan olunduğu üzere sâlifü’z-zikr Hüseyin Ağa mahâllesinde kâin bir tarafdan münhedim han arsası ve etrâf-ı selâsesi tarîk-i âm ile mahdûd fevkānî dört bâb oda ve bir sofa ve bir âbdesthâne ve bir memşâ ve bir matbâh ve bir zîr-i zemîn ve bir mahzen ve bir bi’r-i mâ’ ve tahtında dört bâb dekâkîn ve müştemilât-ı sâire-i ma‘lûmeyi hâvî bir bâb menzil arsasının terbî‘an yüz yedi buçuk zirâ‘-ı mu‘ayyen mahâlli merhûm Mehmed Subaşı Vakfı’ndan ve mâ‘adâsı Hüseyin Ağa Vakfı’na senevî üç guruş mukāta‘a-i kadîmeli ve üzerinde mevcûde ebniye-i ma‘lûmesi mülk olduğu hâlde kayınpederim müteveffâ-yı evvel-i mezbûr el-Hâc Osman Ağa’nın hayâtında ile’l-vefât bâ-temessük-i mütevellî ve bâ-hüccet-i şer‘iyye müstakillen tasarruf ve temellükünde ve ba‘de-vefâtihî ebniye-i memlûke-i mezkûre zevcem ve müvekkilem mezbûre Saliha Sabire Hanım ile müteveffât-ı sâniye-i mezbûre Hafize ve hâzıra-i asil ve vasiyy-i mezbûre Nefise Hatun’a mesele-i mîrâsları vechile mevrûs ve vakfeyn-i mezkûreynden olan arsa-i mezkûre dahi ancak zevce ve müvekkile-i mezbûre ile müteveffât-ı sâniye-i mezbûre Hafize Hanım’a âdiyen ve münâsafeten ba‘de’l-intikāl mezbûre Hafize Hanım dahi fevt oldukda ebniye-i memlûke-i mezkûreden ırsen mâlike olduğu hisse-i şâyi‘ası zevci mefkūd-ı mezbûr ile vâlidesi hâzıra-i mezbûre Nefise Hatun ve evlâdı mezbûrûna mevrûs olup ve arsa-i mevkūfe-i mezbûreden dahi intikālen mutasarrıfe olduğu nısf hisse-i şâyi‘ası yine evlâdı mezbûrûna âdiyen ve islâsen intikāl etmiş iken mezbûrân Hasan Efendi ve Fâtıma Hanım ve hâzıra-i asıl ve vasiyy-i mezbûre Nefise Hatun’dan her biri ma‘a müştemilât-ı mezkûre menzil-i mahdûd-ı merkūmu el-yevm ber-vech-i [15b] iştirâk müstakillen zabt [ve] vaz‘-ı yed eder olmalarıyla binâen-aleyh ebniye-i memlûke-i mezkûreden zevcem ve müvekkilem mezbûre Saliha Sabire Hanım ber-mûceb-i münâsaha-i mezkûre üç yüz otuz altı sehim hisse-i şâyi‘asıyla arsa-i mevkūfe-i mezkûrenin nısf hisse-i şâyi‘asını zi’l-yed olan merkūmûndan taleb ve da‘vâ ve ahz ü kabza ve ba‘de’l-kabz semen ve bedel-i misilleriyle bâ-re’y-i mütevellî âhara bey‘ ve ferâğ ve teslîme ve semen ve bedellerini ahz ü kabz ve kendüye i‘tâ ve teslîme şehr-i sâbık Zilka‘detü’ş-şerîfesi gurresinde medîne-i mezbûrede mahzar-ı şuhûdda vekâlet-i âmme-i mutlakā-i sahîha ile beni tarafından bâ-mazbata tevkîl eylediğinde ben dahi vekâlet-i mezkûreyi kabûl etmemle el-hâletü hâzihi ebniye-i memlûke-i mezkûrenin ber-minvâl-i muharrer üç yüz otuz altı sehim hisse-i şâyi‘asıyla arsa-i mevkūfe-i merkūmenin nısf hisse-i şâyi‘asından bâ-re’y-i mütevellî keff-i yed ve bana teslîme merkūmân Hasan Efendi ve Fâtıma Hanım ile hâzıra-i asıl ve vasiyy-i mezbûre Nefise Hatun’dan her birine tenbîh olunmak matlûbumdur deyü bi’l-vekâle da‘vâ etdikde mezbûrân Hasan Efendi ve Fâtıma Hanım dahi cevâblarında ber-vech-i muharrer ikrâr fakat müdde‘î-i vekîl-i mûmâ-ileyh Mustafa Necib Efendi ber-minvâl-i muharrer vekâlet müdde‘âsını hâzıra-i asıl ve vasiyy-i mezbûre Nefise Hatun ile ma‘an inkâr etmeleriyle müdde‘î-i vekîl-i mûmâ-ileyh Mustafa Necib Efendi ber-minvâl-i meşrûh vekâlet müdde‘âsına beyyine taleb olundukda udûl-i ahrâr-ı ricâl-i Müslimînden olup medîne-i mezbûreden bu esnâda Der-aliyye’ye gelen İzmir Hastahânesi Cerrâhbaşısı Hâfız Mustafa Efendi b. el-Hâc İshak ve Asâkir-i hâssa-i şâhânenin Altıncı Alayının Birinci Bölüğünün Mülâzım-i sânîsi İbrahim Ağa b. Osman nâm kimesneler li-ecli’[ş-şehâde] meclis-i şer‘a hâzırân olup istişhâd olunduklarında fi’l-hakīka zâtı ilm-i şer‘î ile ma‘lûmumuz olup müteveffâ-yı evvel-i mezbûrun sulbiye kerîmesi ve müdde‘î-i vekîl-i mûmâ-ileyhin dahi hâlâ zevcesi olan medîne-i mezbûrede sâkine mezbûre Saliha Sabire Hanım târîh-i mezkûrda bizim huzûrumuzda zikri sebkat eden ma‘a müştemilât bir bâb menzilin arsa-i mevkūfesinin nısf hissesiyle ebniye-i memlûkesinde münâsaha-i mezkûre vechile otuz altı sehim hisse-i şâyi‘asını zi’l-yed olan merkūmûndan taleb [ve] da‘vâ ve ahz u kabza ve ba‘de’l-kabz semen ve bedel-i misilleriyle bâ-ma‘rifet-i mütevellî âhara bey‘ ve ferâğ ve teslîme ve semen ve bedellerini ahz ü kabz ve kendüye i‘tâ ve teslîme vekâlet-i âmme-i sahîha-i şer‘iyye ile tarafından zevci işbu mûmâ-ileyh Mustafa Necib Efendi’yi vekîl ve nâib-i menâb nasb ü ta‘yîn eylediğinde ol dahi vekâlet-i mezkûreyi kabûl etmekle bizler bu husûsa bu vech üzere şâhidleriz ve şehâdet dahi ederiz deyü her biri müttefiku’l-lafz ve’l-ma‘nâ edâ-yı şehâdet-i şer‘iyye etdikde gıbbe’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm ve’t-tenbîh huzûr-ı [âlîlerine i‘lâm olundu]. Fî 3 R sene [12]73. Ser-ketebe.