Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 100 Hüküm no: 80 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi ve Ahmed Ağa’ya olan borcunu ödemesi hususunda Fatımatüzzehra’ya tenbih olunması Ma‘rûz, Bâ‘iseyi’l-i‘lâm Dîvân-ı de‘âvî çavuşlarının kılavuz-ı evveli Hâfız Mehmed Efendi b. Hüseyin ve Ahmed Ağa b. Ömer nâm kimesneler mahfil-i şer‘iyyâtda İstanbul’da Fethiye Câmi‘-i şerîfi kurbünde Kâtib Muslihiddin mahâllesinde sâkine mu‘arrefetü’z-zât Fâtımatüzzehra Hatun bt. Abdullah muvâcehesinde mahâlle-i merkūmede sâkin iken bundan akdem vefât eden el-Hâc Mustafa Efendi b. Ali’nin mukaddemâ sagīre ve hâlâ kebîre sulbiye kızı Servet Hanım’ın vâlidesi ve hâl-i suğrunda tesviye-i umûruna kıbel-i şer‘den vasiyy-i mansûbesi kezâlik zâtı mu‘arrefe Gülfidan Kadın bt. Abdullah hâzıra oldukları hâlde yedimde olup bin iki yüz altmış altı senesi Recebi’l-ferdinin yirminci günü târîhiyle müverraha ve ol târîhde Rumeli Kazaskeri bulunan sudûr-ı izâmdan Abdülhak Efendi merhûmun imzâ ve hatemini hâviye işbu bir kıt‘a idâne hücceti nâtıka olduğu üzere mezbûre Fâtımatüzzehra Hatun mezbûre Servet Hanım’ın hâl-i suğrunda malından vâlide ve vasîsi hâzıra-i mezbûre Gülfidan Kadın yedinden istidâne ve kabz ve umûruna sarfla istihlâk eylediği beş yüz guruşu ve bir senelik bâ-devr-i şer‘î ilzâm-ı ribhi olan yetmiş beş guruş ki cem‘an beş yüz yetmiş beş guruşa biz ve gāib ani’l-meclis Taşçı es-Seyyid Abdurrahman Ağa b. Ali nâm kimesneden her birimiz tarafeynden bi’l-emr ve’l-kabûl kefâlet-i mutlakā-i sahîha-i şer‘iyye ile başka başka kefil ve zâmin olup ve her birimiz bi-hasebi’l-kefâle âharın zimmetine lâzım gelen meblağa dahi kezâlik tarafeynden bi’l-emr ve’l-kabûl kefâlet-i mutlakā-i sahîha-i şer‘iyye ile kefil ve zâmin olduğumuzdan sonra bin iki yüz altmış dokuz senesi Recebi’l-ferdinin yirminci günü târîhiyle müverraha ve ol târîhde askerî kassâmı bulunan sudûr-ı izâmdan semâhatlü el-Hâc Ahmed Şükrü Efendi’nin imzâ ve hatemini hâviye hüccet-i mezkûrenin hâmişi nâtık olduğu üzere mezbûre Fâtımatüzzehra Hatun ribh-i mülzem-i mezkûr yetmiş beş guruş ile senesinden zâid târîh-i hâmişe gelince yirmi dört ay müddetde malından teberru‘ ve ibrâ-i zimmet eylediği yüz elli guruş ki cem‘an iki yüz yirmi beş guruşu vasiyy-i hâzıra-i merkūmeye def‘ ü teslîm eylediğinde ol dahi yedinden bi’l-vesâye ahz ü kabz ve emriyle umûruna sarfla istihlâk etmekle mâ‘adâ asıl mâl-ı mezkûr beş yüz ve yine mezbûre Servet Hanım’ın kezâlik hâl-i suğrunda malından ve vasiyy-i hâzıra-i mezbûrenin yedinden iktirâz ve kabz ve umûruna sarfla istihlâk eylediği yüz otuz guruş ki cem‘an altı yüz otuz guruş ile meblağ-ı mecmû‘-ı merkūmun târîh-i hâmiş-i mezkûrdan i‘tibâren üç senelik bâ-devr-i şer‘î nemâsı olan iki yüz seksen üç buçuk guruş ki min-haysü’l-mecmû‘ zimmetinde deyni olan dokuz yüz on üç buçuk guruşa biz gāib-i merkūm es-Seyyid Abdurrahman Ağa ile ma‘an kezâlik tarafeynden bi’l-emr ve’l-kabûl kefâlet-i mutlakā-i sahîha-i şer‘iyye ile başka başka kefil ve zâmin olduğumuza binâen vasiyy-i hâzıra-i mezbûre Gülfidan Kadın meblağ-ı mekfûlün-bih-i mezkûr dokuz yüz on üç buçuk guruşu sinîn-i mezkûre tamâmında kefâlet-i mahkiyemize binâen ancak bizden bi’l-vesâye mutâlebe ve malımızdan seviyyen ve tamâmen ahz ü kabz ve istîfâ etmekle el-hâletü hâzihi biz dahi meblağ-ı mecmû‘-ı mezkûr dokuz yüz on üç buçuk guruşu mezbûre Fâtımatüzzehra Hatun’dan bi’l-mürâca‘a hâlâ ve seviyyen taleb ederiz deyü vasiyy-i hâzıra-i mezbûrenin tasdîkiyle da‘vâ etdiklerinde mezbûre Fâtımatüzzehra Hatun dahi cevâbında kazıyye minvâl-i muharrer üzere olduğunu ve mazmûn-ı hüccet ve hâmiş-i mezkûreyi bi-tamâmihâ tâyi‘an ve kat‘iyyen ikrâr u i‘tirâf etmeğin mûcebince meblağ-ı mecmû‘-ı mezkûr dokuz yüz on üç buçuk guruşun müdde‘iyân-ı merkūmân Hâfız Mehmed Efendi ve Ahmed Ağa’ya hâlâ ve seviyyen edâ ve teslîmiyle mezbûre Fâtımatüzzehra Hatun ilzâm olunduğu mübâşirleri de‘âvî çavuşlarından Zeyrekli Rüstem Ağa kulları yediyle huzûr-ı [âlîlerine i‘lâm olundu]. Fî 9 Ra sene [12]73. Mehmed Emin.