Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 102 Hüküm no: 81 Orijinal metin no: [16a] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Hamdi Efendi’ye olan borcunu ödemesi hususunda Mustafa Hamdi Efendi’ye tenbih olunması Müftü Hamamlı Osman Çavuş’a teslîm. Ma‘rûz, Mahrûse-i Galata’da Emekyemez mahâllesinde sâkin Mâliye Hazîne-i celîlesinde Masârıfât Muhâsebesi Kalemi ketebesinden derûn-ı arzuhâlde mastûrü’l-ism Ahmed Hamdi Efendi b. el-müteveffâ İmam el-Hâc Hüseyin Efendi mahfil-i şer‘iyyâtda mûmâ-ileyh Ahmed Hamdi Efendi’nin li-ebeveyn kız karındaşı ve hâl-i suğrunda tesviye-i umûruna kıbel-i şer‘den vasiyy-i mansûbesi mahâlle-i merkūmede sâkine mu‘arrefetü’z-zât Hadîce Hanım hâzıra olduğu hâlde mahâlle-i mezbûrede sâkin Rumeli ordu-yı hümâyûnu serhalîfesi sâhib-i arzuhâl Mustafa Hamdi Efendi b. Ahmed muvâcehesinde yedimde olup bin iki yüz altmış yedi senesi Muharremü’l-haramı’nın yirmi beşinci günü târîhiyle müverraha mahrûse-i mezbûre mahkemesinden verilen işbu bir kıt‘a idâne hücceti mûcebince kız karındaşım vasiyy-i hâzıra-i mezbûre pederim müteveffâ-yı mezbûrdan mevrûs malımdan mahkeme-i mezbûrede kısmet muhzırbaşısı olup mûmâ-ileyh Mustafa Hamdi Efendi’nin kayınpederi olan işbu hâzır bi’l-meclis Mehmed Emin Efendi b. Mehmed Arif yediyle mûmâ-ileyh Mustafa Hamdi Efendi’ye bi’l-vesâye idâne ve teslîm eylediği beş bin guruş ile meblağ-ı merkūmun bâ-devr-i şer‘î bir senelik ilzâm-ı ribhi olan yedi yüz elli guruş ki cem‘an mûmâ-ileyh Mustafa Hamdi Efendi zimmetinde alacak hakkım olan beş bin yedi yüz elli guruşu mûmâ-ileyh Mustafa Hamdi Efendi gerek hâl-i suğrumda kız karındaşım vasiyy-i hâzıra-i mûmâ-ileyhâya ve gerek ben ba‘de’l-bülûğ ve ba‘de-isbâti’r-rüşd bana edâ ve teslîm etmeyip el-yevm zimmetinde kalmağla meblağ-ı mecmû‘-ı mezkûru mûmâ-ileyh Mustafa Hamdi Efendi’den hâlâ taleb ederim deyü hâzıra-i mûmâ-ileyhâ Hadîce Hanım’ın tasdîk ve ihâle ve tevkîliyle yine yedimde olan işbu sene-i mübâreke şehr-i Rebî‘ülâhiri’nin yirmi dördüncü günü târîhiyle müverrah İstanbul Mahkemesi’nden verilen işbu bir kıt‘a i‘lâm-ı şer‘î mûcebince Pazartesi günü huzûr-ı hazret-i fetvâpenâhîde da‘vâ eylediğinde ol dahi cevâbında kazıyye minvâl-i muharrer üzere olup ber-mantûk-ı hüccet-i mezkûre meblağ-ı mecmû‘-ı mezkûr beş bin yedi yüz elli guruş bana zimmetinde deyni olduğunu ikrâr, lâkin ben bundan akdem vilâyet-i Anadolu’da Ergani kazâsında mal müdürü iken sana zimmetimde deynim olan meblağ-ı mecmû‘-ı merkūmu iki yüz altmış dokuz senesi Şa‘bâni’l-mu‘azzamı’nın yirmi birinci günü İstanbul’da Boncukcu Hanı’nda sâkin Devlet-i Aliyye teba‘asından gāib ani’l-meclis Sarrâf Tataroğlu Ohannes yediyle kazâ-i mezkûreden bâ-poliçe kayınpederim hâzır-ı mezbûr Mehmed Emin Efendi’ye irsâl ve meblağ-ı mecmû‘-ı mezkûru sana vermek üzere bâ-mektûb emir ve tarafımdan tevkîl eylediğimde ol dahi meblağ-ı mecmû‘-ı merkūmu sarrâf gāib-i merkūmdan tamâmen ahz ü kabz etdikden sonra makbûzu olan meblağ-ı mecmû‘-ı merkūmu emr ü tevkîlim üzere sana vermeyip bi-gayrı hakkın kendi umûruna sarfla istihlâk edip ancak kayınpederim hâzır-ı mezbûr Mehmed Emin Efendi meblağ-ı mecmû‘-ı mezkûru sarrâf-ı gāib-i merkūmdan ba‘de’l-kabz ber-vech-i muharrer emr ü tevkîlim vechile sana vermeyip bi-gayrı hakkın kendi umûruna sarfla istihlâk etmiş ise de mücerred kayınpederim hâzır-ı mezbûr meblağ-ı mecmû‘-ı merkūmu vech-i muharrer üzere sarrâf-ı gāib-i merkūmdan tamâmen kabz eylediğine binâen sana deynim olan meblağ-ı mecmû‘-ı mezkûru edâ etmiş olurum. Öyle olucak sana zimmetimde deynim olan meblağ-ı mecmû‘-ı mezkûrdan zimmetim berîe olmuşdur deyü sûret-i def‘de îrâd eylediği kelâmı şer‘an müvecceh ve mültefit olmadığı kendüye ba‘de’t-tefhîm bu sûretde mûmâ-ileyh Mustafa Hamdi Efendi’nin ikrâr u i‘tirâfı üzere lâzım gelen meblağ-ı mecmû‘-ı mezkûr beş bin yedi yüz elli guruşun bana edâ ve teslîmiyle mûmâ-ileyh Mustafa Hamdi Efendi ba‘de’l-ilzâm meblağ-ı mecmû‘-ı mezkûr beş bin yedi yüz elli guruşun iki bin dört yüz elli guruşunu mûmâ-ileyh Mustafa Hamdi Efendi’den ahz ü kabz etmemle bâkīsi olan üç bin üç yüz guruş dahi mûmâ-ileyh Mustafa Hamdi Efendi’den tahsîl ve bana teslîm olunmak murâdımdır deyü da‘vâ etdikde mûmâ-ileyh Mustafa Hamdi Efendi dahi cevâbında mazmûn-ı hüccet ve i‘lâm-ı mezkûrları bi-tamâmihî tâyi‘an ve kat‘iyyen ikrâr ve tasdîk edip, lâkin müdde‘î-i mûmâ-ileyh Ahmed Hamdi Efendi meblağ-ı bâkī-i mezkûr üç bin üç yüz guruşu kayınpederim hâzır-ı mezbûr Mehmed Emin Efendi’den mutâlebe ve ahz eylesin deyü makām-ı def‘de be-tekrâr îrâd eylediği kelâmı meşrû‘a ve iltifâta şâyân olmadığı mûmâ-ileyh Mustafa Hamdi Efendi’ye ba‘de’t-tefhîm ber-mantûk-ı i‘lâm-ı şer‘î meblağ-ı bâkī-i mezkûr üç bin üç yüz guruş dahi mûmâ-ileyh Mustafa Hamdi Efendi’den tahsîliyle müdde‘î-i mûmâ-ileyh Ahmed Hamdi Efendi’ye i‘tâ ve teslîm buyrulmak muktezâ-yı şer‘-i âlî idüğü tescîl ve huzûr-ı [âlîlerine i‘lâm olundu]. Fî 2 R sene [12]73. Ser-ketebe.