Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 104 Hüküm no: 82 Orijinal metin no: [16a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aliye Hatun’un, kızı Hatice ile damadı Mehmed Hasib aleyhindeki eşya ve alacak davası Nüshateyn, Mübâşirine teslîm, Ma‘rûz, İstanbul’da Haseki civârında Başçı el-Hâc Mahmud mahâllesinde sâkine mu‘arrefetü’z-zât Aliye bt. İbrahim Edhem nâm hatun mahfil-i şer‘iyyâtda mezbûrenin sadriye kebîre kerîmesi bâ‘isetü’l-i‘lâm kezâlik mu‘arrefetü’z-zât Hadîce bt. Hasan nâm hatun muvâcehesinde mezbûre Hadîce Hatun’un hâlâ zevci teba‘adan Mehmed Hasib Ağa b. İbrahim hâzır olduğu hâlde işbu târîh-i i‘lâm şehrinin yirmi birinci günü mahâlle-i merkūmede vâki‘ sâkine olduğum menzilim derûnunda mevcûde emvâlim olup kerîmem merkūme Hadîce Hatun ile dâmâdım hâzır-ı mezbûr Mehmed Hasib Ağa’nın menzil-i merkūmdan mukaddemâ fuzûlî ve bi-gayrı hakkın bi’l-ma‘iyye ahz ü kabz ve bu def‘a bi-a‘yânihâ bana tamâmen red ve teslîme ta‘ahhüd eyledikleri mecmû‘u sekiz bin guruş kıymetli yapağı memlû bir aded döşek ve penbe memlû Merinoz iki aded şilte ve ikisi yazma ve biri atlas üzerine işlemeli üç aded yorgan ve yapağı memlû bir aded Dimisko erkân minderi ve yapağı memlû atlas üzerine işlemeli iki aded koltuk yasdığı ve bir aded orta keçesi ve beş aded Merinoz pencere perdesi ve dört aded sahan ma‘a kapak ve iki aded şorba tası ma‘a kapak ve iki aded tencere ma‘a kapak ve bir aded sarı leğen ma‘a ibrik ve bir aded sarı âbdest leğeni ve biri sepet ve biri ceviz cem‘an iki aded sandık ve bir aded tahta anbar ve iki Saksonya tabak ma‘a kapak ve iki aded Saksonya kâse ve iki aded Saksonya bardak bâ-kapak ve iki aded kara kalem tabak ve on aded soğukluk kemik kaşık ve on aded sîm zarf ma‘a fincân ve beş aded işlemeli havlu ve biri ipekli ve biri dimisko cem‘an iki aded çarşeb ve bir aded mir’ât ve bir aded mangal ma‘a göbek? ve bir aded sarı mangal tahtası ve bir aded nühâs ibrik ve bir aded şalâkî üzerine kılâbdânlı anteri ma‘a şalvar ve iki aded penbe memlû Merinoz şilte ve bir aded Lahori şal hırka ve bir aded yarım zirâ‘ Lahor şal ve bir aded çekmece ve yapağı memlû üç aded minder ve yapağı memlû her biri ipek işlemeli dokuz aded duvar yasdığı ve iki aded atlas üzerine işlemeli yüz yasıdığı ve üç aded beyaz yüz yasdığından mâ‘adâ yine menzil-i merkūm derûnunda mevcûde kezâlik malım olan mecmû‘u yedi bin guruş kıymetli yapağı memlû atlas üzerine ipek işlemeli bir aded yüz yasdığı [16b] ve dört aded minder ve bir aded Merinoz şilte ve dört aded döşek ve üç aded basma şilte ve beş aded baş yasdığı ve beş aded yüz yasdığı ve dört aded koltuk yasdığı beşi basma ve biri Selîmiye ve biri savâî ve biri Merinoz cem‘an sekiz aded yorgan ve sekiz aded pencere perdesi ve yirmi beş aded havlu ve dokuz aded çarşeb ve bir aded sofra ve bir aded Merinoz seccâde ve iki aded sîm zarf ma‘a fincân ve iki aded Saksonya kâse ma‘a tabak ve bir aded kapaksız tabak ve iki aded elmas traş hoşâb kâsesi ma‘a tabak ve bir aded elmas traş bardak ma‘a kapak ve yirmi sekiz aded tabak ve on aded hoşâb kaşığı ve üç aded şamdân ve bir aded polat tepsi ve bir aded sarı sini ve bir aded sahan ma‘a kapağı dahi zevcân-ı merkūmân fuzûlî ve bi-gayrı hakkın ma‘an ahz u kabz etmeleriyle suâl olunup zikr olunan yedi bin guruş kıymetli eşyâ ve evânî-i nühâsiye-i merkūme dahi mevcûde ise a‘yânını ve müstehleke ise ba‘de’s-sübût kıymetleri olan meblağ-ı merkūm yedi bin guruşu kerîmem merkūme ile dâmâdım hâzır-ı merkūmdan ve dâmâdım hâzır-ı merkūm Mehmed Hasîb Ağa zimmetinde cihet-i karzdan alacak hakkım olan beş yüz guruşu dahi ancak dâmâdım hâzır-ı mezbûrdan hâlâ taleb ederim deyü tasaddî eylediğim da‘vâlarımdan rızâmla meccânen fâriğā olmamla mütâlebelerine ve bâlâda muharrer olduğu üzere bi’l-ma‘iyye bana red ve teslîme müte‘ahhid oldukları sâlifü’z-zikr sekiz bin guruş kıymetli eşyâ ve evânî-i nühâsiye-i muharrere-i merkūmeden mâ‘adâ işbu târîh-i i‘lâma gelince sâir cemî‘ hukūk-ı şer‘iyyeye müte‘allıka âmme-i da‘vâdan ben kerîmem mezbûre Hadîce Hatun ile dâmâdım hâzır-ı merkūm Mehmed Hasib Ağa’nın zimmetlerini ibrâ-i âmm-ı sahîh-i şer‘î ile ibrâ ve iskāt eylediğimde kerîmem mezbûre Hadîce Hatun benden iddi‘âsı olup deynim münkire olduğum on bir bin guruş kıymetli üç aded elmas iğne ve bir aded elmaslı alınlık da‘vâsından rızâsıyla meccânen fâriğā olup mutâlebesine ve bi’l-cümle husûs-ı mezkûra ve sâire müte‘allıka âmme-i da‘vâdan zevci dâmâdım hâzır-ı mezbûr ile ma‘an benim zimmetimi kezâlik ibrâ-i âmm-ı sahîh-i şer‘î ile ibrâ ve iskāt ve tarafeynden her birimiz ber-vech-i muharrer âharın ibrâsını kabûl eyledik deyü müdde‘iye-i mukarrere-i merkūme Aliye Hatun’un sâdır olan bi’l-cümle kelimât-ı meşrûhalarını mezbûre Hadîce Hatun ile hâzır-ı mezbûr Mehmed Hasib Ağa’dan her biri tasdîk ve tahkīk ve zikr olunan sekiz bin guruş kıymetli eşyâ ve evânî-i nühâsiye-i muharrere-i merkūmeyi müdde‘iye-i mezbûreye bi-a‘yânihâ redd ü teslîme ta‘ahhüd eyledikleri tescîl ve mübâşirleri Bâb-ı Zabtiye’den Çemişgezekli Hasan Ağa yediyle huzûr-ı [âlîlerine i‘lâm olundu]. Fî 26 Ra sene [12]73. Edhem.